Khliehriat, Rymphang:
U Myntri Sorkar uba dei ruh u MLA ka Khliehriat, Bah Kyrmen Shylla, ha ka Sngi Palei u la plie ïa ka ïing skul bathymmai jong ka Rymbai Government Secondary School, Rymbai, East Jaiñtia Hills District.
U Bah Kyrmen Shylla ha ka jingkren u la pynpaw ka jingkmen ba la ïoh ban tei pynthymmai ïa kane ka skul bad u la ai khublei ïa baroh kiba don bynta ban pynurlong ïa ka jingtei jong ka ïing skul, kynthup ka sorkar, ki dkhot ka School Managing Committee, ki nongïalam shnong bad ki kontraktor.
U MLA u la pyntip ruh ba na ka liang jong u, un buddien ban kyntiew kyrdan ïa kane ka skul sha ka kyrdan Higher Secondary.
Ha kaba ïadei bad ka mat kyrduh kam kyrduh jam, u Myntri u la kyntu ïa ki baroh ban ym shaniah tang ha ka kam sorkar hynrei ban wad ki lad bapher bapher da kaba shim kabu ïa ki skhim sorkar kynthup ïa ka skhim ba dang shu pyllait shen da ka sorkar ka CM-ELEVATE bad kiwei de kiba pynleit jingmut halor ka lad aikam aijam ha kiba bun ki jait kam kynthup naduh ka rep ka riang, ka kam ri jingri, ba ïadei bad ki kam jngohkai bad kiwei kiwei.
U Deputy Commissioner, East Jaiñtia Hills District, A Baranwal, ha ka jingkren u kyrmen ba kane ka skul kan nangkiew na kawei ka por sha kawei bad u pynthikna ruh ba na ka liang ka bor district kan ïarap katba lah ban ai ka jingkyrshan ïa kane ka skul ha ka jingpyrshang jong ka ban nangkiew shaphrang.
Hashwa kane, ka In-charge Head Mistress jong ka skul ka Kong Y Lamare ka la ïathuh ïa ka khana lynkot jong ka skul naduh ba la seng ïa ka ha u snem 1960 bad aiti ruh ïa ka dorkhas sha u Myntri halor ka jingthmu ban kyntiew ïa ka skul sha ka kyrdan Higher Secondary, ka jingshna ïa ka Multipurpose Hall bad ka madan ïalehkai basketball.
Nalor u Myntri kiwei de kiba la ai jingkren ki long u MDC ka thaiñ Bah Finelyness Bareh, Additional Deputy Commissioner, East Jaiñtia Hills District Kong JU Kharpuri, Joint Director of School Education and Literacy, ka sorkar jylla Bah LS Lyngdoh haka jingsakhi lang ki ophisar sorkar, ki nonghikai, ki khynnah skul, ki nongïalam shnong nalor kiwei kiwei.
