Nongpoh, Rymphang:
Ka jingbiang jong ka bording ha ki jaka ai jingsumar ka dei kawei na ki bynta kiba kongsan eh kaba lah ban pynlong ïa ki jaka ai jingsumar ba kin ïoh ban ai ïa ka jingshakri kaba paka tam sha ki paidbah la ka long ha sor ne nongkyndong ruh kumjuh.
Kumba long mynta, ka jylla Meghalaya ka dei kaba lamkhmat ha kane ka bynta napdeng kiwei ki jylla ka thaiñ Shatei Lam-mihngi kaba don haduh 489 tylli ki jaka ai jingsumar kiba la ïoh bording lyngba ka sngi lane kata ka solar energy.
Kane ka jinglamkhmat jong ka jylla Meghalaya ka la paw pyrthei ha ka jingïalang Energy for Health Summit, North Eastern Region Chapter ’24 kaba la pynlong da ka SELCO Foundation ha ka 28 bad 29 tarik jong u bnai Rymphang ha nongbah Guwahati kaba la wan ban ïashim bynta da ki ophisar na ka tnat jong ka koit ka khiah jong baroh phra tylli ki jylla ka thaiñ Shatei Lam-mihngi.
Kumba long mynta, ka SELCO Foundation ryngkat bad ka jingsnoh kti lang jong ki sorkar jylla ka thaiñ Shatei Lam-mihngi, ka la lah ban pynbiang ïa ka bording lyngba ka sngi (solar power) haduh 1500 tylli ki jaka ai jingsumar kiba kynthup 489 tylli ha Meghalaya, 467 tylli ha Assam, 326 tylli ha Mizoram, 167 tylli ha Manipur bad kumba 50 tam ki jaka ai jingsumar ha Nagaland. Ka SELCO Foundation ka don ruh ïa ka thong ban pynlong ïa baroh ki jaka ai jingsumar ka thaiñ Shatei Lam-mihngi kiba biang ïa ka bording ilektrik (solar power) kat haduh u snem 2026.
Ha kane ka jingïalang, ïa ka jylla Meghalaya la lamkhmat da ka Kong Ibamonlang Nongbri kaba dei ka State Programme Manager jong ka National Health Mission ka sorkar jylla ha ka jingïadon lang kiwei ki ophisar bad doktor ka tnat ka koit ka khiah na ka jylla kaba la ai jingkren ruh ha ka rynsan ïakren bad ka Rachita Misra, Associate Director ka SELCO Foundation ryngkat bad kiwei ki nongïalam jong ki kompeni ba paw ym tang ha ka ri, hynrei wat ha ka pyrthei ruh.
Ha kine ki ar sngi, ki ophisar ka tnat ka koit ka khiah ka Meghalaya, ki la ïoh ruh ïa ka jingïaroh na kiwei ki jylla ka thaiñ Shatei Lam-mihngi halor ka jinglah ka jong ki ban pyntreikam bha ïa ka bording (solar power) da ka jingïatrei lang ryngkat bad ka SELCO Foundation ha ka jingïalang kaba la pynlong kyrpang ban ïamir bad ai jingmut hapdeng ki jylla ka thaiñ Shatei Lam-mihngi.
Ha kane ka sngi, la ïohi ruh ïa ka jingdon jong ka jingpyninam ïa ki tiar bapher bapher kiba ïadei bad kumno ban pynbit pynbiang bad pynbha ïa ka rukom ai jingsumar sha ki paidbah khamtam kito kiba don sha ki thaiñ nongkyndong kum ka jaka buh ïa ki dawai, ka drone ban pynpoi ïa ki dawai bad kiwei kiwei ki tiar thymmai kiba pyndonkam lyngba ka bording jong ka sngi.
Kawei na ki mat kaba la ïathir ha kane ka jingïalang ka long halor kumno ban sumar bad pynneh ïa ki tiar ki tar kiba pyndonkam ha kine ki jaka ai jingsumar lyngba ka bording jong ka sngi (solar power) bad ban ai jinghikai ïa ki nongtrei jong ki jaka ai jingsumar ba kin lah ban maramot lane pynbha haba don ki jingthut bad khamtam eh ban pynlong ïa ki jaka ai jingsumar kiba paka sha ki paidbah ha ka jinglut kaba duna eh bad ka bym ktah ruh ïa ka mariang.
Ha kane ka sngi la ïoh ruh ka jingkren na u Dr Ravi Kannan, Director jong ka Cachar Cancer Hospital & Research Centre, uba la ïoh ruh ïa ka khusnam Ramon Magsaysay Award ha u snem 2023 nalor u Thomas Pullenkav, Director jong ka SELCO India.
