Shillong, Lber 01
Ka kynhun na ki jait niam bapher-bapher hapoh ka shatri jong ka Shillong All Faith Forum (SAFF) ha ka Sngi Thohdieng ka la kyrpad ïa baroh ki seng saiñ pyrthei ban phikir haba ki kren halor ka ilekshon ka ban sa wan khnang ba kan ym wanrah kano-kano ka jingïapait ne jingisih para briew.
“Haba ïadei bad ka ilekshon ban sa wan, ngi kyrpad ïa baroh ki seng saiñ pyrthei ban sngewbha ban da phikir ïa kaei kaba phi kren bad kumno phi kren bad leh, bad ym ban wanrah ka jingïapait bad jingisih para briew,” la ong u President ka SAAF, Bishop Purely Lyngdoh haba kren sha ki lad pathai khubor hadien ka jingïalang ba kyrkieh jong ka SAFF.
U la ong ruh ba ka jinglong-jingman hapoh ka ri, thaiñ Shatei Lam Mihngi bad khamtam ha Assam bad Meghalaya ka la poi haduh u pud ha kaba ki nongïalam niam ki hap ban ïeng bad kren, kumjuh ban khot ban wer ïa ki paid nongshong shnong ka Jylla ban tip kumjuh ban long kiba husiar haba ïadei bad ka jinglong-jingman ha kylleng sawdong. Haba kdew ba ka India ka dei ka ri jong ki jait niam bapher-bapher, ha kaba ki briew ki ju ïa im lang sah lang, u Bishop Lyngdoh ha kawei ka liang, u la pynpaw ka jingsngewsih naba ka lyer jong ka jingisih, jingïapait, jingbym ïaishah, bad jingkhñiot beiñ ka la beh ha baroh kawei ka ri.
“Hynrei ïa mynta…phi ïohi kaei kaba jia ha Manipur, ha Assam bad kaba sngewsih bad kaba kyndit ka long ba ngi ïohi ïa ki dak kiba wat ka Meghalaya ruh ka la shah ktah ha ki jaka khappud,” u la ong. U Bishop Lyngdoh u la ong ruh ba namarba ka ilekshon ka la jan, ki lah ban don bun kiba kwah shim kabu ïa ka jinglong-jingman da kaba pynshit ïa ki jaidbynriew bapher-bapher.
“Ngi kwah ban kyrpad ïa ka Sorkar Jylla bad Sorkar Assam – ki dei ban bteng ïa ki jingïakren, wad ïa ka jingshisha bad ym tang ban kren hynrei ban shim ki sienjam ban khang lad ïoh mih kino-kino ki jingjia bym sngewtynnad,” u la ong. Ha kajuh ka por, u la kyrpad ïa baroh ki nongshong shnong ka Jylla bad Assam bad long kiba husiar bad phikir ïa kito kiba pyrshang ban wanrah ka jingthut, jingbym sngewthuh jingmut, jingïapait hapdeng ki briew na bynta ki jingmyntoi kam saiñ pyrthei.
“Sha ki paidbah ka Jylla, sngewbha ban khmih bniah ïa kaei kaba phi ïohsngew, ki khubor, ki kyrwoh kiba phi ïoh pdiang…namar kiba bun, ki lah ban dei ki khubor lamler. Ngim dei ban ngop ha kine,” u la ong.
U la bynrap, “Ngi kwah jingsuk bad namar ka jingjan jong ka ilekshon, baroh ki shongshit bad kumta ngi dei ban leh katba lah ban pynneh ïa ka suk ka saiñ hapdeng baroh khnang ba baroh kan manbha. Ngi khot ngi wer ïa baroh ki nongshong shnong ka Jylla khamtam ha ki khappud ban long kiba jai-jai bad pynneh ïa ka suk ka saiñ.”
