Shillong, Lber 01
Ka Khasi Hills Autonomous District Council (KHADC) lyngba u Bah Pynshngaiñ N. Syiem kum u Deputy Chief Executive Member bad uba dei peit ïa ka tnad Elaka Administration, u la pynpaw ba ka Council kan sa shim khia noh mardor ha kaba ïadei bad ka mat ban shimti biang ïa ka shnat Hima Nongwah-Mawtamur kaba don ha khappud bad ka Assam sha ka Hima Sohïong Lyngdohship.
Haba kren sha ki lad pathai khubor ha ka 1 tarik u Lber, 2024 hadien ka jingïalang kaba la khot hapdeng ki khlieh nongsynshar na ka Hima Sohïong kynthup ïa ki rangbah na katei ka shnat, u Bah Pynshngaiñ u la ong ba ha u snem 2015 la aiti ïa ka shnat Hima Nongwah-Mawtamur ha ka Hima Jirang ban pynïaid ïa ki shnong ki thaw kiba hap hapoh ka shnat Hima Nongwah-Mawtamur, bad u la ong ba ïa kane ruh la sngewthuh la shu leh tang da uwei ne ar ngut ki briew khlem ka jingtip lang jong ka Dorbar Hima Sohïong Lyngdohship.
U la ong ba ka jingkwah jong ki ka long ba la kumno-kumno ban pynphai biang sha ka Hima Sohïong Lyngdohship.
“Ka jingïakynduh jong ngi mynta ka sngi ka long ban khot lang ïa u Syiem Jirang bad ki nongïalam bad ‘riew rangbah jong ka Hima Jirang, Hima Sohïong, ki ‘riew rangbah na ka shnat Hima Nongwah-Mawtamur, ki nongmihkhmat na kito ki shnong bapher-bapher bad nangta kin sa shim ïa ka rai”, la ong u Bah Pynshngaiñ.
U la ong ba kan sa don shen ka jingïakynduh bad ki bor Hima na Jirang kiba peit ïa kane ka shnat ha u snem 2019 ha kaba yn ïamir jingmut kumno ban pynïaid shakhmat ïa kane ka kam bad ka KHADC hi kan sa pynbeit ryntih ïa ki kam baroh kiba ïadei bad kane ka shnat.
Da kaba pynpaw ba katei ka shnat ka dei kaba shah klun jaka na ka por sha ka por ha ka Jylla Assam bad kumta donkam ïa ka synshar-khadar kaba skhem.
Haba ïakren bad u Bah Pidion Lyngdoh Thabah, Acting Lyngdoh ka Hima Sohïong, u la ïathuh ba katei ka shnat ka kynthup ïa 58 tylli ki shnong bad ka jingangnud ka long ba ka shnat baroh kawei kan wan lut sha ka Hima Sohïong.
“Ngin pyrshang ban pynïoh ïa kaba dei, ngin thaw ki lad ki lynti ban pynïoh namar ba ka don ka jingjah lynti bad ka don ka jingud; kumta, ngin ïa pyrshang ban pynïoh khamtam lei-lei ba kin hap shapoh ka jylla jong ngi”, la ong u Bah Pidion.
U la ong ba ka jingpoi katei ka shnat ban khmih da ka Hima Jirang ha ki snem ba la dep ka dei tang ka jingleh bakla shimet ki briew bad mynta kin sei ïa ki kot ki sla ban kam trai ïa ka.
