Shillong, Rymphang:
Ka jingdawa kaba la slem na ki nongpynmih phlim Khasi hapoh ka jylla mynta ka lah ban urlong hadien ba u Myntri ba dei peit ïa ka tnad Arts and Culture ka sorkar jylla, Bah Paul Lyngdoh u la pynthikna ban shna noh ïa ka cinema kaba rung haduh 200 ngut ha State Central Library, Shillong.
Kane ka jingpynthikna u Bah Paul ka dei hadien ba u la leit jurip ïa ka Soso Tham Auditorium Hall kaba don ha State Central Library ha ka 29 tarik Rymphang ha ka jingsynralang ki nongpynmih phlim na ar tylli ki kynhun jong ka jylla kata ka Meghalaya Film Maker’s Association (MeFliMA) hapoh ka jingïalam u Bah Commander Shangpliang kum u Preisdent bad ka Fraternity Arts Cine Entertainment Shillong (FACES) hapoh ka jingïalam ka Kong Simi Khongtiang kum ka President ha ka jingïadonlang ki ophisar.
U Bah Paul u pyntip ban shna ar tylli ki hall kawei na bynta ka cinema bad kawei ka hall ban lehkai sawangka (drama) kaba la mang pisa na ka Sorkar India na ka National Library Museum ha ka jinglut kaba ` 2 klur 23 lak.
U la pyntip hadien ba la dep jurip un sa shong ban pyrkhat ban ïoh sdang noh ïa ka kam.
Na ka liang u Bah Commander Shangpliang uba dei u President ka seng ki nongpynmih phlim hapoh ka jylla kaba tip kum ka Meghalaya Film Makers Association (MeFliMA) u la ai khublei ïa u Bah Paul Lyngdoh kum u Myntri ba dei peit ïa ka tnad Arts and Culture uba la wan jurip ban pynkhreh ban shna kawei ka cinema hall ïa ki phlim Khasi.
U la ong ba ka seng ka la ai jingmut ba ka sorkar kan shna lang ka studio ban pyndonkam ki nongpynmih phlim haba ki shna ki phlim katkum kane ka juk kaba mynta.
U la ong ba lada shna cinema ha Library ka kham suk ïa ki paidbah lada ki wan na Anjalee, Ïewduh, Khyndailad namar ka dang jan haba ka don mar pyrshah ïa ka Civil Hospital Shillong.
