Shillong, Lber 01
Ki heh jong ka Election Commission of India kin nym wan sha Meghalaya kaba don tang 2 tylli ki Lok Sabha konstitwensi na ka bynta ban khmih ïa ki jingpynkhreh ïa ka ilekshon.
Haba ïakren bad u Chief Electoral Officer (CEO) ka Jylla, u BDR Tiwari, u la ong ba haduh mynta kam don kano-kano ka jingai jingtip ba kin wan ki heh jong ka ECI sha Jylla hynrei ka jingïakren ka la ïaid man ka por lyngba ka Video Conference haba ïadei bad ki jingpynkhreh ïa ka ilekshon.
U la ong ba ka ECI ka lah ban phah tang da ki ophisar jong ka sha kane ka Jylla bad kumba ka long mynta, ka Jylla ka la pynkhreh ban pynlong ïa ka ilekshon sha Ïingdorbar Lok Sabha jong ka ri.
U Tiwari u la ong ruh ba ki Jylla ba kham rit lehse kim da donkam eh ban da wan ki heh ka ECI lait noh ki jylla kiba kham heh khamtam kiba hap ban pynlong ïa ka ilekshon MLA bad ilekshon Lok Sabha ha kajuh ka por.
Ha ka ri baroh kawei, ki don tang saw tylli ki Jylla kiba pynlong lang ïa ka ilekshon MLA bad ilekshon Lok Sabha ha kajuh ka por. Kita ki long ka Sikkim, Arunachal Pradesh, Andhra Pradesh bad Odisha.
Ka Meghalaya ka don tang ar tylli ki konstitwensi Lok Sabha kita ka Shillong Lok Sabha bad Tura Lok Sabha konstitwensi.
Haba kylli kumba katno yn donkam ïa ki pulit pahara kiba dei ki Central Armed Police Force (CAPF) na ka bynta ka ilekshon Lok Sabha ha kane ka Jylla, u Tiwari u la ong ba um lah ban ïathuh ïa kata.
Lada long kum ha ka ilekshon Lok Sabha kaba la dep, ka ECI ka lah ban pynbna ban pynlong ïa ka ilekshon Lok Sabha bad ilekshon MLA ha kitei saw tylli ki Jylla ha ka taïew ban wan.
