Shillong, Lber 15
U General Secretary cum Publicity Secretary ka Hynñiewtrep National Liberation Council (HNLC), Bah Saiñkupar Nongtraw, ha u kyrwoh khubor ba la pynmih lyngba ka rynsan Facebook ha ka Sngi Thohdieng, u la pyntip ba u Bah Budnar Disiar na ka shnong Mawpen, u dei u dkhot jong ka seng uba la kyllon ïap ha ka jingïakhun bad ki pulit Special Operation Team (SOT) ka jylla ha u snem 1994 ha State Central Library, Shillong.
Kane ka jingpyntip jong u Bah Saiñkupar ka long hadien shi sngi ba ka HNLC ka la shim jingkitkhlieh halor ka jingpynbthei bom ha Them Metor ha ka 9 tarik Lber ha kaba u la ong ba ka kynhun ‘Budnar Shadow Squad’ ka la donkti ban pynbthei ïa u bom IED, bad kane ka kynhun ka long kum kata ka ‘Special Force’ jong ka HNLC.
Namarkata, la lah ban sngewthuh ba ïa ka ‘Budnar Shadow Squad’ la ai nam ha ka kyrteng jong utei u dkhot ka seng uba la shah siat ïap ha u snem 1994.
Haba batai shuh shuh halor ka jingjia ïa u Bah Budnar, u Bah Saiñkupar u la ong ba une u dkhot ka seng u la shah kerkut ha ki pulit SOT bad ha ka jingïakhun u Bah Budnar u la ïoh ban siat ïa arngut ki pulit SOT kiba la dei kuli na ryndang bad uwei na shadem bad na ka liang ki pulit kiba la syrtap ki la synreit kuli naphang kat haduh ba u Bah Budnar u la kyllon khram bad khlad shi syndon.
U Bah Saiñkupar u la ong ruh ha ka por ba ka la don ka jingïasiat ha State Central Library ha utei u snem, la don uwei ruh u dkhot ka seng uba la shah kem ha kata ka por bad uba la pyndem wait hadien bad une u rangbah u dei uba la tip kyrteng kum u Bah Kynsai Jyrwa ïa uba ju khot ieid kum u Bah Hep Jyrwa bad u dang im haduh mynta.
Na ka liang ka seng, u Bah Saiñkupar u la ong, ka don ka jingkyrmen ba shisien ka sngi kan sa ïoh ban pynïeng ïa u mot sahnam kum ka dak ka jingburom halor ka jinglen lade jong u Bah Budnar kum u ‘riewshlur ka ban long ka matti jong ki longdien-mandien.
