Shillong, Naiwieng 06
Ka United Democratic Party (UDP) ka la rai ban pynkhlaiñ shwa ïa ki samla ban jied ïa ki nongkitkam ha ka General Council ban long ha u bnai Nohprah 2026.
Haba ïakren bad u Bah Titos Chyne uba dei u General Secretary ka UDP u la ïathuh haba ki MLA, MDC bad ki nongïalam ki la mih hynrei ki don beit kiba bteng ban pynkhlaiñ ïa ka seng.
U la ïathuh ba ka UDP kan pynkhlaiñ mynta ïa ki District bad khamtam ki circle kaba ki MLA ki la phet, namar kum u President bad Secretary ka Youth Wing kiba batkam dei ki MLA hynrei mynta hap ban pynthymmai biang ha kaba la buh ha ka taïew kaba nyngkong jong u Nohprah kaba don ka General Council ban jied nongkitkam ba thymmai.
“Haba dang don u President, ka pyni ba ka seng ka dang khlaiñ namar ki la bun kiba la ai ktien na kylleng ki jaka bad ki District ba ki kwah ban pynïasoh sha ka UDP” u la ong.
U la pynkynmaw biang haba ka UDP ka ïatreilang ha ka Sorkar khleh khawlang naduh u Bah E.K Mawlong bad u Dr.Donkupar Roy ki ju ong ïa ka “Gentlemen agreement” ka bym donkam ban ïathoh ïatar hynrei ka dei ka jingïaburom mar kylliang haba don lang ha ka juh ka kynhun” u la ong.
Halor ka jingaidaw ki MLA ba u President um don jingkitkhlieh ïa ka jingeh jong ki, u Bah Titos u la ong ba u Bah Metbah u la ju ïakren ïa ki shimet-shimet hynrei kam da don eh kaba heh kata ka jingujor.
“Ka jingshet kylla kam dei ïa ka seng haba ki MLA ki la mih hynrei ka jingshet kylla ka dei ïa ki paidbah kaba ki la jied ïa ki na ki Constituency tangba ki paidbah kin sa bishar” u la ong.
U la ïathuh ba don ki por ba ym dei shuh ban ai tiket hynrei namar ba u dei u briew uba la slem haba la ai tiket u jop na ka UDP hynrei haba ka seng ka la leh bha ka shong pat ha ki paidbah ban bishar ïa ki.
