Shillong, Naiwieng 06
Ka Shillong Ropeway Project mynta ka la kylla long ka jingïakyntait jong ki ar mamla, ha kaba ka Sorkar ka ong ba kam lah ban pyndam ne pynkynriah ïa ka projek bad ki nongïakhih ki ong, ba kin nym ailad ban tei ïa kane ka projek ha u Lum Shyllong.
Ïa katei ka jingpyrshah ïa ka Shillong Ropeway Project la sakhi ha Barik, ha kaba ka Joint Action Com-mittee (JAC) Against Shillong Ropeway Project, ka la pynlong ïa ka jingïakhih da kaba shong kyllaiñ mungor ha khmat u mot jong u Kiang Nangbah, shisngi hadien ba ka Sorkar ka la pynpaw ba ka jingïateh kular ïa ka jaka ka pynskhem ïa ka jingïaid shakhmat ïa ka projek bad ka projek ka jngai 3.15 km na ki tyllong um.
Ka Kong Venitia Mawlong haba kren sha ki lad pathai khubor ka la ong, ba ka jingïakhih shong kyllaiñ mungor kam dei ba ki dang shu sdang, hynrei kane ka jingïakhih ka dei kum ka jingpynkynmaw sha ki paidbah ba ka JAC, kam klet ban ïakhih naduh ka sngi kaba nyngkong.
“Ngi kum ka JAC ngi la mih sha surok bad kane kam dei ka jingsdang hynrei ka dei ban pyni sha ki paidbah ba ka JAC kam shym la shongthait naduh ka sngi nyngkong,” ka la ong. Haba kynthoh ïa u Myntri ka tnad Tourism u Bah Paul Lyngdoh, ka Kong Venetia ka la ong ba ka jingkren jong u ba ym donkam ban ïam ka pynpaw ïa ka jingbym sngewthuh ïa kaei kaba ki longkmie jong katei ka thaiñ ki ïakynduh, bad ka la long kum ka jingthombor shimet.
“Nga kwah ban kren shai khamtam ïa u Myntri ka tnad Tourism u Bah Paul Lyngdoh, uba dei u briew khatar bor, kumno un ong ba ym donkam ban ïam, hato u sngewthuh ïa kaei kaba ngi ki longkmie ngi ïaid lyngba, um dei ban kren ïa ki ktien kiba thombor shimet ïa ngi,” ka la ong. Ka la pynkynmaw ïa ka mynnor jong u Bah Paul Lyngdoh kum u President ka KSU, ha kitei ki por ki paidbah ki shaniah ïa u Bah Paul ban lum lang ïa ki khun Khasi bad ka la kylli kylla mynta, balei ba uta u juh u nongïalam mynta u ïeng pyrshah ïa ki mar shu bat ha ka shuki Myntri.
“Balei mynta u pyrshah ïa ngi, u byrngem ïa ngi lyngba kita ki buit jakhlia jong u,” la ong ka Kong Venetia. “Sngewbha wat byrngem ïa ngi ki paidbah, wat pyntieng da ki buit jakhlia jong phi, sngewbha buh ïa ki buit jakhlia jong phi ha ïing jong phi.”
Watla u Bah Paul u don shabar ri, hynrei ka Kong Venetia ka la ong ba ka khubor ka dei ban poi sha u bad ka JAC kam shongthait.
Haba kylli, hato ka JAC kan phai khmat sha ka Meghalaya High Court, ka Kong Venetia ka la ong ba ka JAC kan nym ujor sha ka High Court na ka bynta ban tuklar halor kane. Ka mukotduma ha Ïingbishar, ka la kynthoh, kan pynkylla ïa ka jingïakhun na ki paidbah sha ki nongïasaid aiñ na baroh arliang bad kan pynkut noh ïa ka jingïakhih ha surok.
“Ngin sa ïaleh hi katba lah,” ka la ong.
Halor ki tyllong um, ka Kong Venetia ka la ong ba ka pynsngewsih ïa ka ban ïohi ïa u briew uba la ïeid ïa ka shnong ka thaw, mynta, ha ki kyntien jong ka, u pyndonkam ïa ka shuki ban byrngem kylla ïa ki paidbah nongshong shnong.
“Lada u Bah Paul um don ha ka shuki mynta, un don ryngkat bad ngi mynta namar ba u dei u briew uba ïeid ïa la ka shnong ka thaw ha kawei ka por hynrei mynta u don ha ka kyrdan, u don ha ka shuki, ka shuki mynta lehse ka la nang khlaiñ shuh-shuh, kumta u byrngem, ym tang ïa ngi ki paidbah ka Raid Laban hynrei u la byrngem ïa ka Jylla baroh kawei”.
“Hato phi tharai ba u briew uba na shabar u tip ïa ki tyllong um bam um dih, ngam tharai kumta bad u Bah Paul ruh u dei ban pule bniah bha. Wat ïakren eiei shuh shaphang u Lum Shyllong,” ka la ong.
“Ngi ïeng skhem bad kaba kut ka long tang kumne, wat ktah satia ïa u Lum Shyllong bad ngin ym ailad ïa phi ban ktah ïa u Lum Shyllong,” ka la ong.
