Shillong, Naiwieng 06
Ka Joint Action Committee (JAC), ka la pynpaw ïa ka jingsngew lyngngoh bad jingsngewsih halor ka jingjah rngai u MLA ka South Shillong Konstitwensi u Bah Sanbor Shullai, khamtam haba ki la mih ban ïakhih bad ka jingïakajia kaba la mih hapdeng ki nongshong shnong ka Riat Laban bad ki Rangbah Shnong katei ka thaiñ.
Ka JAC ka la buh jingkylli halor ka jingbym wan mih jong u nongmihkhmat ka thaiñ, ban peit ïa ka jinglong jingman, watla ki paidbah ki la ai jingkyrshan ïa u naduh ba u long MDC, hadien ba u la shah jied kum u MLA bad mynta kum u Myntri Sorkar.
“Ki paidbah ki la don bynta ban kyrshan ïa u ha ki por ilekshon, hynrei mynta haba ki paidbah ki donkam ïa ka jingdon bynta jong u, um shym la wan ban sngap ïa ka jingeh jong ngi,” la ong ka JAC.
Ha kajuh ka por, ka JAC ka la pynskhem ïa ka rai ban bteng ïa ka jingshong kyllaiñ mungor bad sah miet syndon ha u Motdur u Kiang Nangbah, tad haduh ba ka Sorkar kan da weng noh ïa kane ka projek bad pynkynriah noh sha kiwei ki jaka.
“Ngin myntoi aiu ban jied nongmihkhmat hynrei mynta pat u jah. Kam don jingmyntoi ban jied ïa u briew uba phai da lyndet ïa ki jingeh jong ngi. Haba ngi donkam ba un ai ka jingkyrshan hynrei u shu peitkai pynban,” la ong ka JAC. Nalorkata, ka JAC ka ong ba ha ka por ilekshon u la kular ïa ka bneng bad ka khyndew, katba mynta pat u jah, u Bah Sanbor u dei ban wan ha kane ka jaka ïakhih jong ngi, ki la ong.
