Shillong, Naiwieng 06
Ka Seng Kur Thabah ka pynpaw ïa ka jingdiaw halor ka jingjia kaba wan jia ha kawei ka khun samla jong ka kur kaba la shitom jur na ka daw ka jingmynsaw na ka jinging ding, kaba la pynsah umdum ruh ïa ki bahaïing hasem, la ka dei ba kane ka samla ka thang hi lane don ki briew kiba donkti.
Katkum ka FIR ba la ujor da ki bahaïing katei ka samla ha Mawdiangdiang Police Outpost ha ka 01 tarik Naiwieng 2026, ka kdew ba katei ka samla ka mih na ïing ha ka 29 tarik Risaw 2026 ban leit sha Guwahati na ka bynta ka prokam bad ka ong ïa ki bahaïing ba kan wanphai ha ka 01 tarik u Naiwieng 2026, hynrei la pyntip sha ki bahaïing ba la pynkit ïa katei ka samla sha NEIGRIHMS ha ka por 3 shiteng eiei mynstep jong ka sngi U Blei ban ïoh ka jingsumar namar ka jingmynsaw ba ka la ing ding shiteng ka met ha ka ïingsah uwei u briew u bym dei na ka jaidbynriew Khasi ba ka leit ban sahmiet ha kawei ka shnong kaba hap hapoh ka jingpeit jingkhmih ka Mawdiangdiang Police Outpost.
Haba kren sha ki nongthoh khubor, u President ka Seng Kur Thabah Seng Kmie, u Bah N.R. Thabah u la ong ba ka kur ka dap da ka jingsngewkyndit ban tip halor kane ka jingjia bad pynpaw ka jingsngewsih haba ïadei kane ka jingjia.
U la ïathuh ba kane ka samla mynta ka dang don ha ka jingshah sumar hapoh ICU ha NEIGRIHMS, u la ïathuh ba katkum ka jingïoh jingtip na ki doktor kiba peit ba sumar ka jingmynsaw lane ka jinging ding katei ka samla ka la long kumba 45% na ki bynta ka met bad kane ka samla haduh mynta kam pat lah ban kren ne ban ïathuh ïa kane ka jingjia.
U la pynpaw ka jingsngewkhia ba kum ka kur kam pat ju mad ïa kiba kum kine ki jingjia ha ka kur, ha kaba u la kyntu ïa ki khun samla jong ka kur Thabah ba kin long kiba husiar ïa ka leit ka wan, ka jingïadei paralok bad ki briew ki bym dei na kajuh ka jaidbynriew.
Haba ïadei bad ka jingtohkit, u Bah Thabah u la ai ka jingïaroh ïa ki bor jong ka pulit kiba la trei shitom ban shimkhia ïa ka jingujor jong ki bahaïing ïa kaba ki bor pulit ki la kem ïa utei u samla ba katei ka samla ka leit ban sahmiet ha katei ka miet bad ban pynlong ïa ka jingtohkit ban lap ïa ka daw tynrai jong ka jingjia.
U la ong ba kum ka Seng Kur ka pynrem jur ïa kane ka jingjia bad ong ba kane ka jingjia ka la ktah jur ïa ka jingsngewlem jong ka kur, ha kajuh ka por u la pynpaw ba kum ka kur kam lah ban kynnoh ïano-ïano, hynrei ka shaniah ha ka jingtohkit ki bor jong ka aiñ ban tip ïa ka jingshisha.
