Shillong, Naiwieng 06
U Chairman ka Green-Tech Foundation (GTF), u Bah H. Bansiewdor Nonglang u la pynphai nia kylla ïa u Bah Paul Lyngdoh, Myntri ba khmih ïa ka tnad Jngohkai Pyrthei ka Sorkar da kaba ong “Bah Paul wat laplah than bad da antad shuwa ban kren”.
Ïa kane u Bah H.B Nonglang u la kren hadien ba u Bah Paul u la buh jingkylli pyrshah ïa ka GTF, ba ka don u dak jingkylli halor ka jingmih jong ka ban pyrshah halor ka projek Ropeway.
U Bah H.B Nonglang u la ong ba ka GTF ka la ïatreilang bad ka JAC hadien ba ka la bishar bniah ïa ka jingud jingnam ki dkhot ka JAC, wat hapdeng ka jingshah kynthoh ha ka Sorkar.
U la ong ba ka GTF ka la kyrshan ïa ka jingïakhih pyrshah ïa ka Shillong Ropeway Project, kadei hadien ba ki longkmie na Laban bad Lawsohtun ki la wan sha ophis jong ka GTF ha u bnai Jymmang, Jylliew, Naitung 2026, da kaba sngewkhia ba ki dieng ki shah pom ha katei ka thaiñ.
“Nga la ong ngin sa peit, ngin sa tih jylliew bniah bad ngin sa pyrkhat bad ynda ngi la leit, ngi lap ba ka la don shisha ka jingpom dieng,’ u la ong.
“Haba ki kmie ki wad jingïarap, kumno ngin kyntait,” u la ong, da kaba bynrap “Lada ngi hap ban ïakhih na ka bynta ki tyllong um bam um dih, ngin ïakhih”.
U la ong ba ka jingïakhih hadien 4-5 bnai halor kane ka mat ka long ban ïathuh paidbah ïa ki jingshisha kiba ka Sorkar kam shym la ïathuh.
“Ngi kwah ban pyntip sha ki paidbah, ba kin tip ruh ïa ki jingshisha, haduh mynta ka Sorkar kam pat ïathuh ïa phi ïa ki jingshisha,” la ong u Bah H.B Nonglang.
U Bah H.B Nonglang u la ong ba ka jingïatai paidbah ka la pynleit jingmut ha ki 544 tylli ki dieng kiba la pom, bad ka jingsngewsih halor kita ki dieng ka long kaba shisha. Hynrei ki kot ki sla, u la kam, ki pyni ïa kaei kaba wan ha ki jaka jong ki Terminal.
“Hato phi tip, ha ki artylli ki Terminal kiei ki jait jingtei kin mih, hato phi tip kin wan ki Restaurant, ki Food Court, ym dei ba kren tang da ka kyntien, hangne ha ka jingthoh ka don baroh” u la ong.
U Bah H.B Nonglang u la ong ba kane kan plie lad ban pynlong jaka shimet bad ka jingpynlong jaka khaïi pateng ha u Lum Shyllong.
“Lada ngi duh noh shisien, wat kren shuh shaphang u Lum Shyllong nangne shakhmat,” u la bynrap.
