Shillong, Naiwieng 06
Ka Khasi Hills Bazar Bus Association ka la pynpaw ïa ka jingpyrshah halor ka jingthmu jong ka Sorkar ban pynkynriah ïa ki bos ïew kiba ju ïeng ha jaka pynïeng kali ha Mawlong Hat da kaba kdew ba kane ka jingthmu kan ktah jur ïa ki nongñiah bos bad ki nongshong ïew ha ka thaiñ.
La ong ba ka Sorkar ka thmu ban pynkynriah ïa ki bos ba ju ïeng ha katei ka jaka sha kawei pat ka jaka bad ban pynrung ïa ki nongshong die madan ba harud surok.
Haba kren sha ki nongthoh khubor u Bah Kyrshan Rynjah Secretary ka KHBBA u la ong ba dang shen ka Sorkar ka la pynmih ïa ka hukum kaba bthah ïa ki bos ban pynthylli noh ïa katei ka jaka naduh ka 12 tarik u Naiwieng bad ba ki bos kin ïeng noh ha ka jaka pynïeng kali kaba don mar pyrshah jong ka Anjalee Cinema Hall. U la kynnoh ba kane ka rukom bthah ka Sorkar ka long kaba la shu leh kyrkieh ha kaba ki nongñiah trok kim shym la ïoh por ban ïa shong ban ïapyrkhat bad ban ai ïa ka jubab kaba biang sha ka Sorkar.
U Bah Kyrshan u la ong ba kane ka jaka ïeng bos ka dei kaba la rim bad kaba la slem bha kaba la don da ki 50 snem sha jrong, ka dei ruh ka jaka ba ki nongrep ki wan ban pynpoi ïa ki mar rep jong ki sha Ïewduh, namar kata u la kyntu ïa ka Sorkar ban sngewthuh ïa ka jingai jingshakri jong kane ka jaka bad ban pyrkhat thymmai haba ïadei ka jingrai jong ka ban pynkynriah ïa ki bos na katei ka jaka.
U la pynpaw ka jingbymsngew ïahap ba ka Sorkar kan pynkynriah ïa ki bos kiba la ju ïeng ha katei ka jaka la bun snem bad kiba la ai jingshakri ïa kiba bun ki thaiñ kiba pynïasoh bad ka Ïewduh, “Kane ka long ba ka Sorkar ka kwah ban pyndkut noh ïa u sohpet ksai ka jingïadei ki bos ba la shakri da ki bun phew snem ïa ki paidbah bad ka Ïewduh” u la ong.
Shuh-shuh u la kdew ïa ki kyndon aiñ kiba ka Sorkar ka la shim ba ïa kino-kino ki ïew kiba la palat ïa ka 50 snem, yn ithuh noh kum ki Heritage Market bad buh jingkylli ruh ïa ka Sorkar balei ba kam ithuh kumjuh ïa katei ka jaka ïeng bos kaba la shakri ïa ki paidbah la bun phew snem. “Da lei lei ruh ngi ki nongñiah bos ngin ym mih na katei ka jaka namar ba kam long kaba ïahap ban pynduh jaka ïa kiba la shakri bun phew snem ban ai jaka pat ïa kiba shong madan kiba dang wan katto katne por” u la ong.
U la ban jur ba ka Sorkar kam dei ban pynkynriah ïa ki nongñiah bos na ka jaka bad ba kan sngewthuh ïa ka jingeh ban sa mih lada ktah ïa katei ka jaka, “Ngi don tang kawei ka rai ba ngin ym mih na katei ka jaka ha shuwa lane hadien jong ka tarik ba la buh hynrei lada ka Sorkar ka leh da jingsngewthuh jingmut ngi kloi ban ai ka jingïatreilang bad lada ka leh da ka bor, u paidbah ruh u don la ka kylla kumno ban ai ïa ka jubab” u la ong.
