Mawkyrwat, Lber 15
Ar tylli ki trok kiba kit piat, kawei kaba don ïa u nombor AS010 C2203 bad kawei pat ka bym lah ban ithuh shuh, ki la ingkhong khait hadien ba ki runar ki bym lah ban ithuh, ki la wiang ding dusmon ïa kitei artylli ki kali ha ka por ba ki dang ïeng ha ka lynti hajan Photkylla; ka lynti ban leit sha Ranikor, South West Khasi Hills District.
Katkum ki tyllong khubor ba la ïoh lum, la ïathuh ba katei ka jingjia la antad ba ka la jia ha ka miet jong ka 13 tarik u Lber bad ha katei ka jingjia ym shym la don kano-kano ka jingmynsaw. Ki tyllong khubor ki la ïathuh ba kitei ki kali ki dei kiba kit ïa u piat bad la suba ba ki mut shalan sha khappud Bangladesh. Ïa ka daw jong ka jingshah thang ïa kitei ki kali ym pat tip bad ki pulit haduh mynta ki dang pynlong ïa ka jingtohkit.
