Shillong, Lber 15
Ka Jylla Meghalaya kaba don ar tylli ki konstitwensi ka long kaba la pynkhreh ban pynlong ïa ka ilekshon sha ka Ïingdorbar Thawaiñ Lok Sabha ynda ka Election Commission of India (ECI) ka pynbna ïa ki tarik ban thep vote ban jied thymmai ïa ki dkhot ka Ïingdorbar ha ka ri.
Ka ECI kan pynbna ïa ki tarik pynlong ilekshon ha ka Sngi Saitjaiñ ha kaba ki Jylla kiba kham heh bad kiba don bun ngut ki MP kin hap pynlong bun wat ïa ka jingthep vote.
Haba ïakren bad u Chief Electoral Officer (CEO) ka Jylla, u BDR Tiwari, u la ong ba ka Jylla Meghalaya ka long kaba la pynkhreh ban pynlong ïa ka ilekshon Lok Sabha namar la dep ban ai jinghikai ïa kiba dei ban pynlong ïa ka ilekshon, ka jingpynkhreh ïa ki jingdonkam katkum ki jingbthah ka ECI.
Haba kylli shaphang ka jingdonkam ïa ki bor pahara ha kane ka ilekshon namar ka jinglong-jingman ka shongsuk-shongshngaiñ khamtam hadien ki jingjia pynbthei bom ha Shillong, u Tiwari u la ong ba kane ka dei ka bynta jong ki bor ba dei khmih ban shim ïa ki lad ki lynti da ka jingsngewthuh lang bad baroh ki bor district khnang ba ka jingthep vote kan long kaba ïaid beit ïaid ryntih bad kaba suk kaba saiñ.
U la ong ba ki nongthep vote ha baroh ar tylli ki Lok Sabha konstitwensi ki don palat 22 lak bad u khmih lynti ba ki nongthep vote kin ïashimbynta ha kane ka ilekshon ban pynkhlaiñ ïa ka synshar paidbah.
Halor ka jingkylli ba ka ilekshon Lok Sabha ka kham pjah bad kham duna kiba wan thep vote ym kum ha ka ilekshon MLA, u CEO u la ong ba na ka liang ka tnat ilekshon ka la shim ki sienjam ban pynsngewthuh ïa ki paidbah bad la soi soskular ruh bad ka tnat pule-puthi ka Jylla ban pynrung ruh ïa ka jingsynshar paidbah hapoh ki lynnong pule bad thaw ïa ki electoral club, ban kham pynrung ïa ka jingsngewthuh hapdeng ki samla pule shaphang ka jingkongsan ka synshar ka khadar lyngba ka synshar paidbah.
Namar kata, u kyrmen ba ka jingpoi ki nongthep vote ha kane ka ilekshon kan kham biang ban ïa kaba long ha ilekshon MP ha u snem 2019.
Ka thong ka long ruh ban khring ïa ki samla kiba la kynjoh 18 snem ka rta ban ïoh ïa ka dur thep vote namar kham bun ki samla kiba hapdeng ka rta 18 bad 19 snem kim don ha ka thup kyrteng thep vote, bad lyngba ka jingdonbynta lang ka tnat pule puthi yn sa kham lah ban pynbha ïa kane.
U CEO u la ong ba ki don ar tylli ki konstitwensi – Shillong bad Tura ha kane ka Jylla ha kaba ki nongthep vote ha baroh kawei ka Jylla Meghalaya ki don palat 22 lak ngut.
