Shillong, Lber 15
U MLA barim ka UDP na Nongkrem konstitwensi, Bah Lambor Malngiang, u la ong ba um shym la don daw eiei bad u Bah Ardent Basaïawmoit uba dei u MLA ba mynta na Nongkrem bad President ka VPP.
Haba ïakren bad u Bah Lambor haba ïakynduh hadien ba la kut ka dorbar ka KHADC ha kine ki sngi, u la pynpaw ba um don daw bad u Bah Ardent hynrei ha ka jingïakhun ïa ka ilekshon ka rai ka dei beit ha ki paidbah.
Haba kylli ïano phin kyrshan ha kane ka ilekshon MP Lok Sabha, u Bah Lambor u la ong ba un hap ban kyrshan ïa u kyrtong ba la pynïeng da ka seng UDP namar haduh mynta u dang dei u dkhot ka UDP. Nalor nangta, u Bah Lambor u la ong ba ka jingïaineh ka jong u bad ka seng UDP ka dei namar ki nongïalam ka UDP sengkmie kim shym la pynshitom ïa u wat lada ki MDC ka UDP ha KHADC ki la phah da ka jingthoh ban pynshitom hadien ba u la leit ban kyrshan ïa ka seng NPP ha KHADC.
“Haduh mynta nga dang dei u dkhot ka UDP bad ngan hap kyrshan ïa u kyrtong ba la pynïeng da ka UDP ha kane ka ilekshon MP” u la ong.
Haba kylli biang, la u Bah Ardent u khlem pan jingkyrshan na phi ban kyrshan ïa u kyrtong ka VPP, u la jubab ba u Bah Ardent u khlem ong eiei namar ki ïa don la ka jong ka seng. Shuh shuh u Bah Lambor u la kam ba ka jingkyrshan ka long tang ïa ka Executive Committee ha KHADC hynrei u khlem pat phet na ka seng UDP.
Kham mynshwa u Bah Lambor u la dep ong ba lada ka UDP ka shim ka jingpynshitom tang namar ba u leit kyrshan ïa ka NPP ha KHADC un sa pyrkhat thymmai hynrei haba ka seng kam leh eiei u la rai ban ïaineh beit ha ka UDP. Kum ban shu pynkynmaw, u Bah Lambor u la jop ïa ka ilekshon MLA na Nongkrem ha u snem 2018 kum u kyrtong shimet. Hynrei haba u la ïakhun na ka seng UDP ha u snem 2023 u la rem noh bad ki paidbah ki la jied biang ïa u Bah Ardent Basaïawmoit.
