Shillong, Lber 17
Ka Nan Polok kaba don ha nongbah Shillong, ka dei ka jaka jngoh kai kaba la khring ïa kiba bun eh ki nongjngoh kai pyrthei ha u snem ba la dep.
Katkum ki jingtip na ka tnad kam jngoh kai pyrthei ka Jylla, ki don 5,46,152 ngut ki nongjngoh kai pyrthei kiba la wan sha Nan Polok ha u snem ba la dep.
Hadien ka Nan Polok, ka jaka jngoh kai pyrthei kaba wan ba-ar ha ka jingbun ki nongwan jngoh kai ka dei ka Water Sports Complex, Umïam bad ki nongwan jngoh kai pyrthei kiba la wan sha kane ka jaka ha u snem ba la dep ki don 2,07,423 ngut.
Ha kajuh ka por, ka Dawki Boating Point, Dawki, West Jaiñtia Hills ka la khring ïa 1,91,990 ngut ki nongwan jngoh kai pyrthei ha u snem ba la dep.
Nalor ka Dawki, ka Dympep Valley View Point bad Thangkharang Park kiba ha ka thaiñ Sohra ki la khring ïa 3,00,126 ngut ki nongjngoh pyrthei ha u snem ba la dep – 1,84,745 ha Dympep Valley View Point bad 1,15,381 ha Thangkharang Park.
Kumjuh, ka Shillong View Point ka la khring kumba 1,04,600 ngut ki nongjngoh kai pyrthei katba ka Lady Hydari Park, ka la khring ïa 1,01,216 ngut ha u snem ba la dep.
Shuh shuh, ka Mawlynnong (98,023 ngut), ka Don Bosco Centre for Indigenous Culture (93,551 ngut) bad ka Eco Park (69,994 ngut) – ki jaka jngoh kai kiba ha East Khasi Hills ki la khring bha ïa ki nongjngoh kai pyrthei ha u snem ba la dep.
Kine ki long 10 tylli ki jaka jngoh kai pyrthei kiba hakhmat eh kiba la khring bha ïa ki nongjngoh kai pyrthei na kylleng ha une u snem ba la dep. Nalor kine, ki don ruh kiwei-kiwei ki jaka jngoh kai kiba la khring ïa ki nongjngoh kai pyrthei ha u snem ba la dep.
Ha kawei ka liang, ka jingdon jong ki nongjngoh kai pyrthei (ki bym sahmiet) kiba la wan sha ka Jylla ha u snem ba la dep ka long 26,00,460 ngut ba kynthup ïa 25,58,076 ngut kiba na kylleng ka ri bad 42,384 ngut kiba nabar ri.
