Kyntu u DC ïa ki seng saiñ pyrthei ban bud ryntih ïa ka MCC

Namar kata, u la kyntu ïa baroh ki nongthep 'vote' ba ki dei ban don ka jingkitkhlieh bad ban pyndonkam hok ïa ka hok thep 'vote' jong ki.

Nongstoiñ, Lber 17

U Deputy Commissioner jong ka West Khasi Hills District u la bthah bad pyntip sha baroh ki seng saiñ pyrthei ba kim dei satia ban pynkheiñ ïa ki kyndon jong ka Model Code of Conduct (MCC) khnang ban ïoh ïa ka ilekshon kaba khuid-suba, khlem kino-kino ki jingpynthut hapoh ka distrik.

Ïa katei ka jingbthah bad jingpynkynmaw, na ka liang u DC u la ïoh ruh ban pynlong ïa ka jingïalang kaba kyrpang bad ki seng saiñ pyrthei bapher-bapher kiba napoh ka distrik ban pyntip sha ki shaphang ka jingpyntreikam ïa ka MCC da ka Election Commission of India (ECI), na ka bynta ka jingjied nongmihkhmat sha ka Lok Sabha, 2024.

U DC, Bah Garod L.S.N. Dykes, IAS u la pynkynmaw ba ha ka ilekshon MP 2019, ka West Khasi Hills District ka dei ka distrik kaba duna bha ha ka jingwan jong ki nongthep ‘vote’ bad ka long tang 64.4%. Namar kata, u la kyntu ïa baroh ki nongthep ‘vote’ ba ki dei ban don ka jingkitkhlieh bad ban pyndonkam hok ïa ka hok thep ‘vote’ jong ki.

U la ong ruh ba ha kane kynti, kino-kino kiba kwah ban ïoh jingbit na ka bynta ban pynlong ïa ki jingïalang paidbah, ki ‘rally’ lane kino-kino ki kam kiba ïadei bad ka ilekshon, ki hap ban da pan jingbit bad aplai ‘online’ lyngba ka Suvidha App bad lada kwah ban ujor eiei lane lada don kiba pynkheiñ kyndon, ki lah ban ujor lyngba ka ‘cVIGIL App’.

La ïathuh ruh ba la dep ban pyntreikam ïa u ‘Control Room Number’ 03654280152 lada don kiba kwah jingtip kiba ïadei bad ka ilekshon, kumjuh ruh ïa u ‘toll-free helpline number’ 1950 la dep ban pyntreikam khnang ba ki paidbah ki lah ban ujor ïa kino-kino ki jingujor kiba ïadei bad ka ilekshon.