Shillong, Lber 17
U nongïalam ka UDP bad uba long ruh u Vice-President, Bah Alantry Dkhar, u la kam ba u kyrtong ka United Democratic Party (UDP) Bah Robertjune Kharjahrin uba la pynïeng da ka Regional Democratic Alliance (RDA) u kham khlaiñ bha ha West Khasi Hills kaba kynthup lang ha South West Khasi Hills District bad Eastern West Khasi Hills District.
Haba ïakren bad u Bah Alantry hadien ba ka Election Commission of India (ECI) ka la pynbna ïa ka sngi thep ”vote” ha Meghalaya bad ha ka ri India, u la pynpaw ba ha kine ki sngi ba la leit jingïalang, ka West Khasi Hills, South West Khasi Hills bad Eastern West Khasi Hills ki dei kiba khlaiñ namar ki dei konstitwensi kiba ka ”vote” jong ka UDP bad HSPDP ki khlaiñ bha.
U la ong ba ha East Khasi Hills District bad Jaiñtia Hills District u kyrtong ka UDP un don ka jingïakhun bad kiwei ki seng kiba kynthup ïa kyrtong ka NPP, Congress bad VPP. Katba ha Ribhoi District, u Bah Alantry u la ong ba wat la ka UDP ka don tang uwei u MLA kata u Bah Mayralborn Syiem uba jop na Nongpoh konstitwensi hynrei ha kiwei ki konstitwensi ruh ki don ki nongtrei.
“Haduh mynta ngim pat sngewthuh bha kumno ka lyer, hynrei nga sngewthuh haba nga la leit jingïalang ha Langpih ha kine ki sngi bad u kyrtong jong ngi un khlaiñ bha” u la ong. Nalor nangta, u la ïathuh ba mynta ka Election Commission jong ka ri India ka la pynbna ïa ka ilekshon, ka seng ka hap ban pan jingbit na u Rangbah Shnong, u Officer In-charge ki pulit kaba hap ha kato ka jaka ba pynlong jingïalang bad shlem treikam Deputy Commissioner. U la pyntip ba ka jingpan jingbit mynta kan ïapher mar shu pynbna ïa ka tarik ilekshon namar baroh ki seng saiñ pyrthei ki hap ban pyni ruh ïa ka jinglut jingsep haba pynlong jingïalang.
