Shillong, Lber 17
Ki ar tylli ki konstitwensi ha Meghalaya, ka Shillong bad Tura Lok Sabha konstitwensi kin thep ‘vote’ ha ka wat banyngkong ha kaba ki nongthep ”vote” ki don la ka jong ha kine ar tylli ki konstitwensi.
Ka Shillong Lok Sabha konstitwensi kaba kynthup ïa ki 36 tylli ki konstiwensi MLA, ka don 13 lak,96 hajar 054 ngut ki nongthep ‘vote’, katba ki nongthep ‘vote’ ha Tura Lok Sabha konstitwensi kaba kynthup ïa ki 24 tylli ki konstitwensi MLA ka don 8 lak 21 hajar 046 ngut.
Kane ka long katkum ka thup kyrteng jong ki nongthep kaba la pynmih ha ka 5 tarik Kyllalyngkot 2024.
Ha Shillong, ki shynrang ki don 6,81,769 ngut bad ki kynthei ki don 7,14,283 ngut.
Ha Tura pat, ki shynrang ki don 4,13,178 ngut katba ki kynthei ki kham duna ban ïa ki shynrang bad ki don 4,07,867. Baroh ki nongthep ‘vote’ ha kine ki ar tylli ki konstitwensi ki don 22,17,100 ngut.
Ka jingthep ‘vote’ ha ka wat banyngkong kan long ha ka 19 tarik Ïaïong bad yn ñiew ‘vote’ ha ka 4 tarik Jylliew 2024 ha baroh kawei ka ri ynda la dep thep ‘vote’ ha baroh hynñiew tylli ki wat.
Ka jingpynbna ïa ka ilekshon bad ka jingpynjari ïa ki kyndon pyrkhing ilekshon ha baroh kawei ka ri ka ban neh haduh 2 bnai shiteng kan ktah ruh ïa ka por ban pyntrei ïa ki kam pynroi namar ym lah ban shim rai ne pynïaid shakhmat ïa ki kam kiba dei ban sdang thymmai ha kine ki 2 bnai shiteng lait noh tang ki kam kiba la dep sdang lypa baroh shikatta.
Ka Sorkar kam lah shuh ban buh mawnongrim ïa ki projek kiba dei ban sdang thymmai bad ym lah ruh ban plie ïa ki projek kiba la dep pyntrei. Hap ban ap haduh ban da dep ka ilekshon.
