Mairang, Lber 17
Khnang ban ïoh ïa ka ilekshon Lok Sabha, kaba khuid kaba suba khlem kano-kano ka jingpynthut, bad ban pyntreikam ïa ki aiñ hapoh ki kyndon jong ka 144 CrPC, u District Magistrate, Eastern West Khasi Hills, District, Bah, G. Kharmawphlang IAS, u la pynmih ïa kane ka hukum ban khang pyrshah ïa kine ki kam, kata naduh ba pynmih ïa ka Model Code of Conduct (MCC) da ka Election Commission jong ka Ri India haduh ban da pynbna ïa ka risol ilekshon.
Ha ka kyrwoh khubor, u DM u la pyntip ruh ba ki bynta ba la khang pyrshah ki kynthup ban pynlong ïa kino-kino ki jingïalang, ki jingïaid paidbah, khlem da ïoh jingbit, ban buh ïa kino-kino ki jingthoh, ne ban wah ïa kino-kino ki jingthoh kiba long kum shi bynta jong ka jingïalap ilekshon ha ki jaka sorkar ne kino-kino ki jaka paidbah.
Nangta, ban pyndonkam ïa ki kali Sorkar ne ki Ïing Sorkar na ka bynta ki kam ilekshon, ban pynlong ïa ki jaka mane blei kum ki jaka ïalap ilekshon. Ban pyndonkam ïa ki tynghung pynsawa shuwa ka 6 baje mynstep bad hadien ka por 11 baje mynmiet.
Ha kajuh ka por, la khang ban rah ne thep pisa ha pla palat ïa ka ` 50,000/-, ban wah ‘banner’, ‘placard’, ‘hoarding’, lane kino-kino ki jingthoh kiba ïadei bad kam ïalap ilekshon ha ki ïing jong ki briew, ki jingtei ïing, ki jaka paidbah bad kiwei-kiwei, khlem da ïoh jingbit shuwa na ki trai.
Ban pyndonkam da ki kali kiba khlem ïoh jingbit ha ka por ba pynlong jingïalang ne jingïaid paidbah. Ban thoh ïa ki ‘poster’, ki kot lyngkdop, ki ‘banner’ ki lama bad kiwei-kiwei khlem da ïoh jingbit.
Ban ïalap ilekshon hapoh 100 mitar na ki ‘Polling Station’, ban pyndonkam ïa ki ktien khlem akor ha ka por ba ïalap ilekshon paidbah ne jingïaid paidbah, ban pyndonkam ïa ki lad pathai khubor, la ki dei ki kotkhubor, ne lyngba ki ‘TV’, ‘Radio’, ‘Mobile’, ki SMS, kum ki lad ban ïalap ilekshon khlem da ïoh shuwa ïa ka jingbit.
Shuh shuh u DM u la pyntip ruh ba la khang pyshah ïa ka jingrah suloi ha ki jaka paidbah haduh ban da kut ka ilekshon bad la bthah ïa baroh ki briew kiba don ïa ki suloi laisen kiba dei napoh Eastern West Khasi Hills, District ba kin wan pyndem bad wan buh noh mardor ïa ki suloi jong ki ha ki Police Station kiba hajan eh jong ki.
Hynrei kane ka hukum kan ym treikam ïa ki pulit/ ki shipai bad ki nongïalehkai sport kiba dei ki dkhot jong ka National Rifle, Synjuk bad kito ki briew kiba don bynta ban ïada ïa ka suk ka saiñ, la ki dei kiba lah pynrung kyrteng da ki ‘Security Agency’ lane da ki Bank bad kane ka hukum kan treikam noh mardor.
