Shillong, Lber 17
Ki sur jingrwai ki long shisha kiba pynrhem mynsiem ïa ka jingïaseng jong ka Balang Presbyterian namar ki riewngeit ki la pynleit jingmut bha haba ki dkhot jong ki choir ki la ïeng ha rynsan ban ai ïa ka jingrwai ha ka Jingïaseng Khasi Jaiñtia Presbyterian Synod Mihngi jong ki Rangbah kaba 22 ha Balang Presbyterian Pomlakrai kaba hap ha Lum Shyllong Presbytery bad ha Nongkrem konstitwensi, East Khasi Hills District kaba la sdang naduh ka 14 tarik bad pynkut ha ka Sngi U Blei ka 17 tarik u Lber, 2024.
Ha ka jingïaseng kaba nyngkong ha ka por 10:30 mynstep la rwai da ka Jingïaseng Khynnah Balang Pomlakrai, Jingïaseng Samla Balang Mihmyntdu, Sohkha bad Wahïajer-Moodymmai Presbytery Standing Choir bad u nongkren u dei u Pastor D. Sariang. Ha ka jingïaseng arsien ha ka por 1:30 nohphai sngi la ïoh ïa ka jingrwai na ka Balang Pomlakrai, Balang Rymbai, Standing Choir Jowai Presbytery bad Standing Choir KJP Synod Mihngi bad u nongkren u dei u Pastor B.R Kharnaïor.
Ïa ka jingïaseng la pynïaid da u Moderator ka KJP Synod Mihngi. Haba sam ïa ktien U Blei ha kane jingïaseng, u Pastor B.R Kharnaïor u la sot na ka Gospel u Mathaios ka Lynnong 13 dkhot 1-9 bad 18-23 kaba kren shaphang ka pharshi, kaba la ong “Uba don ki shkor ban sngew to un sngew” kane ka jingkren u Jisu Khrist ka dei ka pharshi ïa u nongbet.
U la ong ba ka pharshi kaba u Jisu u la kren ha ki por mynshwa ka long ban pyndep ïa ka jingïathuhlypa.
U la ïathuh haba ki paidbah ki la bud ïa u Jisu katba u ïeng halor ka lieng, u la kren da ka pharshi da kaba ong u nongbet ban bet katba dang bet khyndiat ki hap harud lynti ki sim ki la bam noh, kiwei ki hap ha jaka maw bym don khyndew ki la mih tangba kim long jylliew, ka khyndew kaba la ïeng ka sngi ki la shit tyrkhong namar kim don thied ki la ïap ryngkhiang, kiwei kiba hap ha dieng shyïap bad ki la ïa kjap kiwei pat kiba hap ha khyndew ka long kaba seisoh.
Kumta u la ong kiba wan Jingïaseng Synod Mihngi ki don ki paidbah ki bym sngewthuh ïa ka pharshi kaba u la kren ha kane ka jingïaseng.
Katba u Pastor D. Sariang uba sam ïa ka ktien U Blei ha ka jingïaseng kaba nyngkong, u la kren shaphang kawei na kaba shiphew kaba ki khun khristan ki dei ban ai ïa ka jingainguh kaba ki la ïoh ban kamai ha ka shisngi ne ha ka shibnai khnang ban pynkhlaiñ haba ïalap sha kiwei pat ki jaidbynriew.
