Shillong, Lber 17 (UNI)
U President rangbah jong ka National People’s Party (NPP) uba long ruh u Myntri Rangbah ka jylla, u Conrad K Sangma, ha ka Sngi U Blei u la pynbna ba ka NPP kan ym pynïeng kyrtong ha ka ilekshon MP Lok Sabha na Arunachal Pradesh, bad kan kyrshan ïa ki kyrtong ba la buh da ka seng BJP.
Lah ban kdew ba ka NPP ka don ha ka kynhun National Democratic Alliance (NDA) ba la ïalam da ka BJP ha ka Sorkar Pdeng bad kumjuh ruh ha ka North East Democratic Alliance (NEDA).
“Ka National People’s Party ka la rai ban ym ïakhun na ki artylli ki Lok Sabha konstitwensi ha Arunachal Pradesh. Namar ngi ïadei paralok ha ka NDA, ka NPP National Committee ka la rai ban kyrshan ïa ki kyrtong ka NDA ha Arunachal Pradesh bad la bthah ïa ka NPP State Committee ban kyrshan ïa ki kyrtong jong ka NDA,” la ong u Conrad haba pynbna ïa kane ha rynsan ‘X’.
Na ka liang u Myntri Rangbah ka Assam uba long ruh u Convenor ka NEDA, u Himanta Biswa Sarma, u la ai jingïaroh ïa u Conrad halor katei ka rai.
Lah ban kdew ba ka BJP kan pynïakhun da u Myntri Sorkar Pdeng, u Kiren Rijiju, na Arunachal West Lok Sabha konstitwensi bad u Tapir Gao na ka Arunachal East Lok Sabha konstitwensi.
“Kaba kum kane ka jingaiti lut ki paralok jong ngi kan pynthikna ba ka NDA hapoh ka jingïalam jong u Myntri Rangbahduh, u Narendra Modi, kan jop palat 400 ngut ki MP. Khublei Shibun @SangmaConrad Ji,” la ong u Himanta ha rynsan ‘X’.
