Nongstoiñ, Lber 18
Kumba 7 snem ka Hima Nongmynsaw Syiemship ka la dep ban ïaid lynti hadien ba la ïoh ban pynkhie im biang ïa ka da ka KHADC ha ka 6 tarik u Lber 2017, hynrei kane ka Hima la ong ba haduh mynta ka la ïoh ban lum kumba 41 tylli ki shnong ba kynthup ïa ki shnong Khasi bad Garo bad ban ai ruh ïa ki sanad bad ki pud synshar ki jong ki.
Ïa kane la pynpaw da u Bah Phlowing Syiem Nongbah, Acting Syiem Hima Nongmynsaw haba kren ha ka jingïalang dorbar bah jong ka Hima Nongmynsaw kaba la long ha ka Sngi Saitjaiñ ba la dep ha Langpih.
Katei ka jingïalang bah jong ka Hima Nongmynsaw, ka dei ruh ka sien ba nyngkong lehse naduh ba ka Hima ka la ïoh biang ïa ka bor. Ha katei ka sngi nalor ki nongkitkam ka Hima la donlang ruh ki sordar shnong, ki rangbah shnong, ki khun ki hajar ka hima, ki ‘riew rangbah, ki kur na ka jait Syiem Nongbah bad ka jingthmu jong ka jingïalang ka long ban pynbna sha ki khun ki raïot ba ka KHADC ka la ithuh biang ïa ka Hima Nongmynsaw.
Shuh shuh ha katei ka sngi nalor u Acting Syiem, la donlang ruh u Syiem Khynnah ka Hima Nongmynsaw u Bah Auxillius Syiem Nongbah, u Bah Johnes Sohshang Secretary Hima Nongmynsaw, Bah S Nongrem uwei na ki ‘riew rangbah jong ka Hima, bad u Bah EA Lyndem, RO ka tnat Planning ka West Khasi Hills kum u kongsan.
U Bah EA Lyndem haba kren ha katei ka sngi u la ong, kane ka jinglah jong ka Hima ban lum lang ïa 41 tylli ki shnong ka la dei kawei na ki jingjop jong ka Hima wat la ka dang ïoh ban pynkhie im biang ha u 2017. Kane kam dei kaba suk ha kaba wat ha ki Hima kiba don tang ki Khasi, ka kham shitom hynrei ka Hima Nongmynsaw tang ha katto-katne snem ka la lah ban lumlang ïa kitei ki shnong bad kane ka la dei ka burom kaba khraw ïa ka Hima.
U la ong ruh ba ka jingjop kaba ar ïa ka Hima ka long ba wat la ki ong ka dang sahdien hynrei ha ka jinglap ka jong u, kane ka Hima ka la lah ban ai pud synshar shnong haduh 41 tylli ki shnong.
Namar kata, u la kyntu ruh ïa ki para Khasi nangne shakhmat kin ïa beh ban pynbiang ïa ki kot ki sla jong ki khyndew ki shyiap kumba pynbiang ki paralok Garo bad u la bynrap ruh ba kaba sngewtynnad ka long ba kane ka Hima ka ai ïa ki pud synshar kam shym dei tang ka jingthoh ha ka kot lane ka jingthwet kaba shu antad hynrei ka Hima ka la don ïa ki nongthep nongwoh kiba long katkum ka juk ba mynta.
Kumta u la kyntu ïa ka Hima ba ka dei ban ïai pynshlur ïa ki paidbah ba kin wan shakhmat ban pynrung kyrteng ïa ki khyndew.
Shuh shuh u la ban jur ruh ba kim dei ban pynmih kano-kano ka jingkulmar namar kan ktah ïa bun ki bynta namar wat ka jingpynbeit ïa u pud u sam ruh ka shong ha ka jingdon ka shongsuk shongsaiñ. Lah ban ong ba mynta kane ka thaiñ hadien ka jingwan ka Hima la sdang ban ïohi ïa ka shongsuk shongsaiñ, kumta ïai ïaleh bad pynheh ïa kane ka bynta.
