Shillong, Lber 18
U President ka Voice of the People Party (VPP), Bah Ardent M. Basaïawmoit u la ther tyngeh ïa u Myntri Rangbah ka Jylla, u Conrad K. Sangma bad ka MP ka Tura, ka Agatha K. Sangma namar ka jingpynthame halor ka mat ba ïadei bad ka Citizenship (Amendment) Act, 2019 (CAA).
Haba ai jingkren ha ka jingïalang pynshai paidbah kaba la long ha Khliehshnong, Malki ha ka Lah Sngi U Blei, u Bah Basaïawmoit u la buh jingkylli ba ka Sorkar MDA ka la kren aïu halor ka CAA.
“Mynta haba nga peit ïa ki kotkhubor, nga sngew thamula ba ki pyrshang ban pynbiej, pynthame, ba kata ka CAA kan ym treikam hapoh Meghalaya. Ngam tip ki mut ban ong kumno ba ka CAA kan ym treikam hapoh Meghalaya. Sngap ïa ka jingkren jong u Amit Shah…kumno u ong, kaei kaba u Amit Shah u kren…yn ym lah shuh da lei-lei ban khang ïa ka CAA ba kan treikam lada phi pyrshah katno-katno,” u la ong.
Ha kajuh ka por, u la ong ba katei ka jingkren u Myntri ka tnad kam pohïing ka Sorkar Pdeng ka dei ka jingshisha namar ka CAA ka la kylla long ka aiñ.
“Shipara ki don ha ka NPP, kawei ka MP, hangne u Myntri Rangbah. Hangne u Myntri Rangbah u rwai da kawei ka sur, sha Delhi, ka para ka rwai da kawei ka sur (na kajuh ka seng), sa katno ngin dang shah pynthame,” la ong u President ka VPP.
Haba pynsngew ba lada ki briew kiba wan rung lyngba ka CAA ki lah ban long trai shnong jong ka ri India, u la ong, “Lah ban khang ma ngi shane ban ong wat rung…don aiñ aïu ban ïada ïa ngi mynta.”
U Bah Basaïawmoit u la kynnoh ruh ba ka Sorkar MDA ka la shah ba ka Sorkar India kan weng noh ïa ka kyrteng Khasi-Jaiñtia na ka Bengal Eastern Frontier Regulation (BEFR) ne ka Inner Line Permit (ILP).
“Ha ka jaka ban ïakhih bad ïakhun ïa kata ka jingpynbna kaba la pynmih lyngba ka hukum u President, naba ka long pyrshah ïa ka Riti Synshar, ki mynjur pynban da ka rai hapoh ïingdorbar thawaiñ ban thoh sha Delhi,” u la ong.
Haba pynpaw ba katei ka sienjam ban mynjur kam don jingmut bad ka dei tang ka jingpynbiej, u la ong ba ka Sorkar ka la dei ban wanrah biang ïa ka kyrteng Khasi-Jaiñtia ha ka BEFR bad kam donkam ban pan jingbit nangno-nangno.
“Kan shu pynmih da ka jingpynbna…ka ILP ka la dei ban treikam ha Ri-lum Khasi-Jaiñtia. hynrei ki shu pynbiej ïa u paidbah,” u la ong.
Shuh shuh utei u nongïalam u la bynrap ba ka la dei por ïa ki paidbah ban pynpaw ïa ka jingbym shaniah shuh ïa kitei ki nongsynshar da kaba sdang naduh ka ilekshon MP ka ban long mynta bad ban jied ïa u kyrtong ka VPP.
