Shillong, Lber 18
U nongaiktien jong ka Bharatiya Janata Party (BJP) Meghalaya Unit uba long ruh u heh pulit (IPS) ba la shongthait na ka kam, Bah Mariahom Kharkrang, u la ong ba katkum ka jingkheiñ jong ka International Monetary Fund (IMF) ka la pynbna ba ka India ha u snem 2028 kan sa kot sha ka 6.9 trillion dollar ka rukom ïohnong bad kan tam ïa ka 5 trillion dollar ha u snem 2026. U la ong ba kane ka dei ka India kaba thymmai kaba kum ki nongshong shnong ki phai khmat bad ïohi ïa ka roi ka kiew ha ki 10 snem ba la leit.
Kum ban shu pynkynmaw hangne, ka seng BJP ka khlem pat pynbna satia ïa ki kyrtong ki ban ïakhun ïa ka ilekshon MP napoh ka Shillong bad Tura Parliamentary Constituency. Kumta ha ka lympung ban ïa pyrkhat bad ïakren halor ka jingpynkhreh bad ka jingïakhun ïa ka ilekshon MP Lok Sabha sha ka ïingdorbar Parliament ba la ban ïashim bynta da ki kyrtong bad ki nongmihkhmat na ki seng saiñ pyrthei bapher-bapher ki ban ïakhun ïa katei ka ilekshon napoh ka 1-Shillong Parliamentary Constituency ba la pynlong da ka Sankardev College ha ka Lah Sngi U Blei, ka seng ka la phah da u Bah Mariahom Kharkrang ban mihkhmat na ka bynta ka seng sha katei ka lympung.
Haba ai jingkren ha katei ka rynsan ïatai bad pyni ïa la ki nia kum ki kyrtong, u Bah Kharkrang u la ong hadien ba ka sorkar National Democratic Alliance (NDA), ka la shimti ïa u lakam synshar ha u snem 2014, ka la ïohi ïa ka jingdonkam ban pynbeit thymmai ïa ka rukom treikam na ka bynta ban wanrah ïa ka roi ka kiew na ka bynta ka India kaba thymmai. U la ong ruh hapoh ka jingïalam jong ka sorkar bathymmai, ka India ka la sakhi ïa ka jingkylla ha kiba bun ki liang.
“Kane ka dei ka ilekshon kaba donkam bha bad baroh ki paidbah ki tip mano ban ïalam biang ïa ka Ri ha u snem 2024 wat la ki paidbah kim pat thep satia ïa ki ‘vote’ jong ki, lada phi kylli ïano-ïano ha surok ha syngkien ki tip ba ka BJP kan sa wan biang ha ka bor synshar”, la ong u Bah Kharkrang.
U Bah Kharkrang u ngeit skhem ba ki paidbah kin don bynta bad ka sorkar BJP ba ïalam ïa ka Ri bad ka seng kan pyntikna ruh ba u ne ka kyrtong kiba ki paidbah ki jied ban pynjop ha ka MP ilekshon ki dei ban wanrah ïa ka jingbha jingmiat hapoh ka jylla.
