Shillong, Lber 18
Ka tnat Political Science bad ka IQAC jong ka Sankardev College ha ka 18 tarik u Lber 2024 ka la pynlong da ka lympung ban ïa pyrkhat bad ïakren halor ka jingpynkhreh bad ka jingïakhun ïa ka ilekshon MP ka Lok Sabha sha ka ïingdorbar Parliament halor ka phang “Parliamentary Politics and Political Participation” ba la wan ban ïashim bynta da ki kyrtong bad ki nongmihkhmat na ki seng saiñ pyrthei bapher-bapher ki ban ïakhun ïa katei ka ilekshon napoh ka 1-Shillong Parliamentary Constituency kaba la pynlong hapoh ka Auditorium jong ka kolej.
Ha katei ka lympung, la wan ban ïashimbynta lem ruh da ki khynnah pule jong ki kolej bapher-bapher, ki ‘riew paidbah bad ki nongshah khot sngewbha kum shibynta ban ïoh phylliew bad ïoh ka lad ban sngap bad kylli jingkylli na kitei ki kyrtong halor ki mat bapher-bapher bad kumjuh ruh ban sngap shaphang ki mat treikam kiba kum ki kyrtong ki la buh hakhmat ban pyndep ynda ki la jop ïa katei ka ilekshon. Ïa ka jingïalang ha kane ka sngi la pynïaid da u Dr. S Maxwell Lyngdoh.
Ki kyrtong kiba la wan ban ïashim bynta ha kane ka jingïalang ki don tang 3 ngut kiba kynthup ïa u kyrtong ka VPP u Dr. Ricky AJ Syngkon, u kyrtong ka RDA u Bah Robert June Kharjahrin, u kyrtong shimet u Bah Lakhon Kma bad na ka BJP pat la wan mihkhmat da u nongkitkam ka seng, u Bah Mariahom Kharkrang.
Hynrei kaba sngewlyngngoh pat ka long ba u MP bad uba dei ruh u kyrtong ka Congress, Bah Vincent H. Pala u khlem wan poi sha katei ka lympung bad nalor kata ka kyrtong jong ka NPP, Dr Mazel Ampareen Lyngdoh ruh ka khlem wan satia bad na ka liang ka NPP ruh ka khlem phah ïa kino-kino ki nongkitkam ban leit mihkhmat sha katei ka lympung.
Na ka liang kyrtong ka NPP, Dr Mazel Ampareen Lyngdoh ka la don sha ka shnong Thangsning ha Mawkynrew konstitwensi bad kane ka la paw ha ka jingthoh ba ka la pynmih ha rynsan X.
