Shillong, Lber 18
U Dr. Ricky AJ Syngkon uba dei kyrtong ka Voice of the People Party (VPP) u ban aireng ha ka ilekshon MP sha ka ïingdorbar Parliament jong ka Lok Sabha ka ban sa long ha ka 19 tarik u Ïaïong 2024 napoh ka 1-Shillong Parliamentary Constituency, u la ong ba ka jinglong-jingman jong ka jylla ka dei kawei na ki daw kaba la khynñiat bad pynlong ïa u ban rung shapoh ka jylli jong ka saiñ pyrthei.
Haba ai jingkren ha ka lympung ban ïa pyrkhat bad ïakren halor ka jingpynkhreh bad ka jingïakhun ïa ka ilekshon MP Lok Sabha sha ka ïingdorbar Parliament ba la ban ïashim bynta da ki kyrtong bad ki nongmihkhmat na ki seng saiñ pyrthei bapher-bapher ki ban ïakhun ïa katei ka ilekshon napoh ka 1-Shillong Parliamentary Constituency ba la pynlong da ka Sankardev College ha ka Lah Sngi U Blei, u Dr. Syngkon u la pynpaw ba ka jylla ka long kaba donbok ban don ïa u nongïalam bad uba dei ruh u President ka VPP, Bah Ardent Miller Basaïawmoit uba long u briew uba sngewthuh ïa ka jingdonkam hapoh ka saiñ pyrthei kata ban pynkylla dur bad ban wanrah ïa ka saiñ hima-sima hapoh ka jylla kaba khuid ba suba.
“Ka rukom long rukom man jong ka jylla jong ngi ka la long kawei na ki daw kaba khynñiat ïa nga ba ngan rung shapoh ka jylli jong ka saiñ hima-sima, ka don ka jingmaïan bad nga sngewnguh ba ka jylla jong ngi ka don ïa u nongïalam bad uba dei u President jong ngi, u Bah Ardent Miller Basaïawmoit ha kaba lyngba jong une u rangbah, nga ïohi shisha ïa ka jingsngewthuh ïa ka jingdonkam hapoh ka saiñ pyrthei kumba ka seng jong ngi ka ju kam ba ka jylla ka donkam ïa ka synshar ka khadar kaba khuid ba suba bad ka dei kane ka daw hi ruh kaba lah tan ïanga ban ngam sha ka jylli jong ka saiñ pyrthei”, la ong u Dr. Ricky.
U Dr Ricky u la ong ba ka jylla Meghalaya ka dei ka jylla kaba la shah kyrkhu kyrhai ha U Blei Nongbuh Nongthaw ha ka jingriewspah bad ka jingdon ïa ka mei mariang bad ki mar poh khyndew. Hynrei u la buh jingkylli pat ba ka jylla ka don shaei mynta wat la haba ka la ïaid lynti la 52 tylli ki snem?
U la ong ba ka long kaba sngewsih ban kren shaphang ka jinglong-jingman jong ka jylla kumba ka long mynta namar ka dei ka jylla kaba duk tam bad ka jingduna ha ka liang ka pule ka puthi bad ha kiba bun ki liang ka jylla ka la hiar lut sha trai duh bad kane baroh ka dei namar ka jingbym nang jong ka sorkar ban synshar ïa ka jylla.
“Ngi sngewsarong bha ïa la ka jong ka jylla khamtam ïa ka nongbah Shillong ha kaba ha ki por kiba lah leit ka dei ka nongbah kaba kiew bha ha ka pule ka puthi jong ki jylla shatei lam-mihngi ka Ri hynrei shano ngi don mynta? Ngi don sha trai bad lada ngi kren ïa ka rukom synshar khadar ruh ngi don sha trai, ha ka koit ka khiah ne ha ka jingkhuid jingsuba ruh ngi don sha trai”, la ong u Dr. Ricky.
U la ong ruh ba lada ki paidbah ki jied bad pynjop ïa u kum u kyrtong, un ïakren bad ban jur ha kaba ïadei bad ka jingkyrduh kam kyrduh jam ki samla hapoh ka jylla ban warah ki lad ki lynti ban weng ïa kane ka jingeh.
