Shillong, Lber 18
Ka Sorkar Jylla ka la pan shuh ïa ki jaka thoh eksamin Common University Entrance Test (CUET) kiba dei ban don ha kane ka Jylla khamtam na ka bynta ki samla pule Under Graduate (UG).
Ki samla kiba pyndep ïa ka Class-XII ki hap ban thoh ïa ka eksamin CUET bad ki hap pass na ka bynta ban ïoh leit pule ha ki kolej bapher bapher ha Jylla kiba pynïasoh bad ka skulbah North Eastern Hill University (NEHU) bad sha kiwei ki skulbah jong ka Sorkar kiba don ha kiwei ki Jylla.
Kumba ka long mynta, ki la don lypa saw tylli ki jaka thoh eksamin CUET ha Jylla kiba kynthup ïa ka NEHU Shillong campus, NEHU Tura campus, Rama Krishna Mission Vivekananda Cultural Centre, Shillong bad iON Digital Zone iDZ Qualapatty, Shillong.
Ha kine ki jaka thoh eksamin, ki samla pule ki dang thoh ïa ka eksamin CUET Post Graduate (PG) kaba la sdang naduh ka 11 tarik bad kan kut ha ka 28 tarik u Lber 2024. Ïa ka eksamin CUET la pynlong da ka National Testing Agency (NTA) ha baroh kawei ka ri.
Ha kawei pat ka liang, ka tnat Pule-Puthi ka Sorkar Jylla ka la dep phah shithi la kham slem sha ka NTA ban buh shuh kham bun ki jaka thoh eksamin CUET ha Jylla khamtam na ka bynta ki samla pule ki ban thoh ïa ka eksamin CUET Under Graduate, 2024. Ka tnat pule puthi ka la buh ka jingtyrwa sha ka NTA ban buh shuh shuh ïa ki jaka thoh eksamin kawei ha Williamnagar, Don Bosco College ha Tura, St. Mary’s College, Shillong, bad ha Kiang Nangbah College, Jowai. Ka Sorkar Jylla ka dang ap mynta ïa ka jubab na ka NTA ban ai jingmynjur ban buh ïa ki jaka thoh eksamin CUET ha kitei ki jaka pule.
