Shillong, Lber 18
U kyrtong ka Regional Democratic Alliance(RDA) u ban ïakhun ha ka ilekshon MP ka Lok Sabha, u Bah Robert June Kharjahrin, u la ong ba lyngba ka rynsan ïatai kaba la pynlong da ka Sankardev College kan long ka lad ban pynsuk ïa ki paidbah ka Shillong Parliamentary Constituency ban jied ïa u nongmihkhmat ban phah sha ka Ïingdorbar Thawaiñ namar napdeng ki 6 ngut kiba la wan sha katei ka lympung ki don sa tang 3 ngut ki kyrtong kiba la wan hi dalade khlem da phah da kino-kino ki nongmihkhmat ka seng bad kane ka la pynsuk arshah ïa ki paidbah ba kin jied ïa kyrtong ba ki mon.
Haba ai jingkren ha ka lympung ban pyni ïa la ki nia kum ki kyrtong ki ban ïakhun ïa ka MP ba la pynlong ha ka Lah Sngi U Blei, u Bah Kharjahrin u la ong ba uwei na ki kyrtong u ban ïakhun ha kane ka ilekshon MP yn nym shah ban rung hapoh ka ïingdorbar thawaiñ, uwei pat u ban pep na ka por sha ka por katba kiwei pat kin slem beit ha kiba bun ki liang kiba kynthup naduh ka jingpynslem ban pyntreikam ïa ka Inner Line Permit (ILP) hapoh ka jylla, ka jingpynslem ban kynthup ïa ka ktien Khasi ha ka khyrnit kaba phra jong ka riti synshar ka Ri bad ka jingpynslem ban pynbeit ïa u pud u sam bad kiwei-kiwei.
Utei u kyrtong u la ong ba u kwah ban ai ïa ki lai tylli ki jingkular kiba kynthup naduh ka jingïada ïa ki paid riewlum hapoh ka jylla, ka jingpynneh-jingpynsah ïa ka dur ka dar bad ka riti ka dustur jong ka jylla, ban pynkiew bad pynbha ïa ka jingmyntoi jong ki paidbah ka jylla.
“Ngi ïeng na ka bynta ban ïada ïa ka Ri bad ka Jaitbynriew bad ïa ka Jylla, ngi ïeng ïa ka ban pynneh-pynsah ïa ka riti ka dustur bad ïa ka snap kaba kyrpang jong ka jylla bad kumjuh ruh ban kyntiew ïa ka jylla ha ki liang baroh”, la ong u Bah Kharjahrin.
U la ong ruh ba ka jingïalam ka dei ka jinglah ban pynkylla ïa ka jingïohi jngai sha ka jingshisha da kaba pynurlong bad kum ka RDA ka thrang ban pynkylla lyngba ki lai tylli ki kyndon lane ki “Triple P”.
U Bah Robert u la ong ba lada ki paidbah ka Shillong Parliamentary Constituency ki jied bad ailad ïa u kum u kyrtong un ïaleh ban pynbor ïa ka sorkar ban pyntreikam nyngkong eh ïa ka ILP hapoh ka jylla Meghalaya.
“Ngi kum ka RDA bad ka jingïohi jong ngi, ngi kwah ban pynkylla ïa kine lai tylli ki kyndon ne ki ‘Triple P’ ban ïada, ban pynneh bad ban kyntiew sha ki jingshisha bad da kumno-kumno ngi donkam ban ïada ïalade bad kumta ngi kwah ban pyntikna ba lada phi jied ïa ka RDA, ngin pyntikna ban pynbor ïa ka sokar ban pyntreikam nyngkong eh ïa ka Inner Line Permit hapoh ka jylla Meghalaya”, la ong u Bah Kharjahrin.
Shuh shuh utei rangbah u la pyntikna ruh ba lada ki paidbah ki pynjop ïa ka RDA, kin pyntikna ba kin ai jingshngaiñ na ka jingsngew ïapher ñiam ha kylleng ka Ri India bad ba jingmane blei ka dei ka hok jong uwei-pa- uwei u briew bad kane kan ïaineh hapoh ka Ri India.
“Ngin pyntikna ruh ba ngin pynbor ïa ka Sorkar India ba kan pynsted ha ka ban kynthup ïa ka ktien Khasi ha ka khyrnit baphra bad kumjuh ruh ka jingpynbeit pud jingpynbeit sam hapdeng ka jylla Meghalaya bad Assam ha kaba ngin pynbor ruh ïa ka Sorkar India ba kan khmih bad peit biang ruh halor ka jingpynbeit pud ha ka kylla kaba nyngkong bad kumjuh ruh ba ka sorkar pdeng ka dei ban khmih biang halor ka jingpynbeit pud hapdeng ka India bad ka Bangladesh”, la ong u Bah Kharjahrin.
Halor ka jingkyrduh kam jingkyrduh jam, u Bah Robert u la ong ba ka jingkyrduh kam jingkyrduh jam bad ka jingbym donkam-donjam ka dei kawei na ki mat kaba hakhmat tam hapoh ka jylla Meghalaya. Kum ka RDA, ka kwah ban ai ka jingkular ba khnang ban wanrah ïa ka ïoh kam ïoh jam hapoh ka jylla, ka don ka Office Memorandum kaba pyntikna ba 44% ki jaitbynriew riewlum ki dei ban ïoh kam ha ki jaka treikam sorkar kata ha ki Group B bad C bad kane ka long kaba donkam ban pyntreikam noh kham kloi.
“Ngin pyntikna ba kane ka OM ka dei ban treikam pura bad ngi sngewdei ba khnang ban wanrah ïa ka ïoh kam ïoh jam ki samla hapoh ka jylla, ka donkam ban wanrah ïa ki skhim bapher-bapher khnang ba ki samla kin lah ban ïeng ha la ki jong ki kjat”, la bynrap u Bah Robert.
