Shillong, Lber 18
Ka Voice of the People Party (VPP) ha ka Lah Sngi U Blei ka la pynlong ïa ka jingïalang pynshai paidbah ha ka dong Khliehshnong, Malki kaba hap hapoh 16 – East Shillong konstitwensi.
Kane ka konstiwensi ka dei ruh ka ktem jong ka MLA bad kyrtong MP ka National People’s Party (NPP) ha kane ka ilekshon ban wan sha ka Lok Sabha, ka Dr. M. Ampareen Lyngdoh.
“Ki paidbah ha kiba bun ki jaka ki la dep rai lypa ban kyrshan ïa ka VPP bad ka la bha ïa kine kiwei ki seng ba kin ïohi ïa kane ka jingthoh kaba shai ha ki kynroh ba ki paidbah kin ai ka jingkyrshan,” la ong u President ka VPP, Bah Ardent M. Basaïawmoit haba ai jingkren ha ka jingïalang.
U la ong ruh ba ki don bun bah kiba la pynsngew ba ki la dep mad ïa ka Congress, NPP, UDP, bad kumta ha kane ka kynti, long katba long, kin ai lad ïa ka VPP, naduh ka ilekshon MP, MDC bad MLA.
Haba kdew ba ka don ka jingkyrmen ïa ka jaidbynriew, u Bah Basaïawmoit u la ong, “Lada phi kyrshan ïa ka VPP phin ym babe, hynrei phin bynnud ba kane ka seng ka dang shu mih shen, phin ong ba ka la dei ban mih 10 snem mynshuwa.” Ha kajuh ka por, u la pynkynmaw ba u la sdang pyrta ïa ka saiñ pyrthei kaba khuid ba suba naduh u snem 2010 hynrei u shah kynthoh, tangba kane kan shym la pynduh mynsiem ïa u naba u sngewthuh ba dei tang lyngba ka synshar-khadar kaba khuid kaba lah ban wanrah pat sa shisien ïa ka jingkyrmen ïa ka jaidbynriew.
Haba kren shaphang ka jinglong-jingman jong ka Jylla khamtam ki jaka khappud, u la ong ba ka don ka jingtieng, jingsyier hapdeng ki paradoh-parasnam kiba shong ba sah ha Khanduli, Ummat, Jatalong bad kumta ter-ter.
“Kane ka Sorkar MDA-2 ka la thok, ka la ong ba ka don ka jingshongsuk ha ki jaka khappud, hynrei dang shen ngi la wan sha Khanduli, ngi la kylli na ki nongshong shnong halor ka jinglong-jingman…ki la ong ‘ngin suk kumno haba tang rep ruh ngim ïoh leit rep shuh’. Ka Sorkar MDA ka nud ban ong ba ka la shongsuk; ka mut ka hun lada ki briew jong ngi kin ym ïoh rep shuh,” ther u Bah Basaïawmoit.
Haba ban jur ba ka Sorkar ka dei ban pynbiang ïa ki jaka sumar, utei u nongïalam u la pynpaw ka jingsngewkhia halor ka jingduna ka tnad ka koit ka khiah khamtam ka jingbym don ‘Neurologist’ ha ki jaka sumar Sorkar.
U la ong ruh ba ki nongshong shnong ha ka thaiñ Hingaria, Huroi kiba ha khappud bad ka Bangladesh ki shah ieh khunswet ha ka Sorkar ha ka liang ka surok, umbam-umdih, bording, bad lada pang da shitom, ki hap ban leit sha Bangladesh ban ïoh jingsumar.
Haba kynthoh ïa ka Sorkar halor ka jingbym phaikhmat sha ki nongrep, nongri-jingri, u la ong ka MDA-1 hashuwa ka ilekshon ka sam ïa ki skhim rep, skhim sniang nalor kiwei-kiwei da kaba kynnoh ba kine baroh ki long tang ki jingpynbiej ïa u paidbah.
“Ki paidbah ki dei ban don ka bor sngewthuh, bor shemphang ba ki lah ban bishar ïa ki suri kup snieh langbrot kiba wan sha u paidbah ha ka dur jong u langbrot, hynrei kiba dei pynban ki suri ki ban bamduh bad pynjot ïa u paidbah,” u la ong.
Shuh shuh halor ka jingkhmih bniah ïa ka bhah thung kam kaba ka Sorkar ka la thung da ka ‘Expert Committee’, u Bah Basaïawmoit u la bynrap, “Ngi dawa ba ka bhah thung kam ka dei ban long katkum ka jingdon paid hapdeng jong ngi bad ki para Garo, ngi la kren kum ka seng ba lada ka Sorkar kam lah ban wanrah kumba ngi-ngi dawa, hadien ka ilekshon MP, ngin hap ban ïakhih biang lada donkam.”
Ha kane ka jingïalang, la donlang ruh u kyrtong ka VPP ha kane ka ilekshon ban wan sha ka Lok Sabha, Dr. Ricky A.J. Syngkon, Vice-President, Dr. Kara Chen nalor kiwei-kiwei ki nongïalam bad nongkitkam ka seng.
