Shillong, Lber 18
Ka North East Students’ Organisation (NESO) ha ka Lah Sngi U Blei ka la mudui da ka mukotduma hapoh ka ïingbishar ba ha khlieh-duh ka Ri, ka Supreme Court pyrshah ïa ka Rule jong ka Citizenship (Amendment) Act 2019 bad kyrpad ruh ïa ka ïingbishar Supreme Court ban pynmih da ka hukum ban pynsangeh ïa ka jingpyntreikam ïa ka Rule jong kane ka aiñ.
U Chairman ka NESO, Bah Samuel Jyrwa u la pynthikna ba ka NESO ka la buh ka jingmudui ha Supreme Court, ban tynruh ïa ka Rules jong ka Citizenship (Amendment) Act, 2019 ha ryngkat ka jingkyrpad ïa ka ïingbishar ba kan pynmih ïa ka hukum ba pynsangeh shuwa ïa ka jingpyntreikam.
Lah ban pynkynmaw ba hashwa kane, ka NESO ka la dep ban buh ka jingujor hakhmat ka ïingbishar Supreme Court ha ka 19 tarik, Nohprah, 2019 pyrshah ïa ka Citizenship Amendment Act 2019.
Wat la ïa kane ka aiñ la pyllait ban pynjari ha ki jylla ba la shah kdup ha ka Inner Line Permit (ILP) ba kynthup ïa ka jylla Mizoram, Nagaland bad Manipur bad kumjuh ruh ha ki jylla ba hap hapoh ka Khyrnit Hynriew ba kynthup 98% ha ka jylla Meghalaya, 70% ha ka jylla Tripura bad ha ki 8 tylli ki District jong ka jylla Assam hynrei ha ki 27 tylli ki district jong ka jylla Assam ym shym la pyllait satia.
Kumta halor kane, ka NESO ha ka kyrwoh na u Chairman, Bah Samuel, ka la ong ba kane ka la buh jingma ïa ka thaiñ Shatei Lam-Mihngi baroh kawei ha ki sngi ki ban sa wan.
Ka NESO ka ong shuh shuh, na ka bynta ban ïada ïa ki jaidbynriew ritpaid jong thaiñ Shatei Lam-Mihngi kiba la shah ktah na ka jingwan rung kyrthep jong ki mynder ri na Bangladesh, la donkam ba ïa ka CAA 2019 ym dei satia ban pyntreikam namarba kan nang pynsniewdur shuh shuh ïa ka jinglong-jingman jong ka thaiñ hi baroh kawei.
La ong ba ïa kane ka jingmudui, yn sa tian bishar ha ka 19 tarik mynta u bnai hadien ba ka ïingbishar Supreme Court ka la buh sngi ban shong bishar. Ïa ka NESO la lamkhmat da u Chairman u Bah Samuel Jyrwa ryngkat ka jingsynran lang u Adviser ka NESO u Samujjal Bhattacharjya, u President ka Khasi Students Union (KSU) Bah Lambokstarwell Marngar bad kiwei kiwei.
