Shillong, Lber 18
Ki lai tylli ki seng ha ka Lah Sngi U Blei ki la dawa na ka Sorkar Meghalaya Democratic Alliance (MDA) ban kyntu ïa ka Sorkar Kmie ba kan pyllait pura noh ïa ka Meghalaya na ki kyndon ka Citizenship (Amendment) Act, 2019 bad Citizen (Amendment) Rules, 2024 bad ban pyntreikam noh mardor ïa ka Inner Line Permit (ILP) ban pyrkhing ïa ka jingwan rung ki briew ba nabar sha kane ka jylla.
Kine seng ki kynthup ïa ka Hynñiewtrep Youths’ Council (HYC), ka Jaiñtia National Council (JNC) bad ka Confederation of Ri Bhoi People (CoRP), ha kaba ki la dep ban aiti ruh da ka dorkhas sha u Myntri Rangbah ka Jylla u Conrad K Sangma ba un shim khia ban tuklar halor kane ka jingdawa.
“Ngi la dawa na u Myntri Rangbah ba un ïakren bad ka Sorkar Kmie ba kan pyllait noh pura ïa ka Meghalaya na ka CAA 2019 bad ka Rules jong ka nalor ban pyntreikam ïa ka ILP kloi katba lah,” la ong u President ka HYC u Bah Roy Kupar Synrem haba kren sha ki lad pathai khubor.
U la ong ba ka Ministry of Home Affairs, ka Sorkar India ha ka 11 tarik Lber, 2024 ka la pynmih ïa ka Citizenship (Amendment) Rules, 2024 na ka bynta ban pyntreikam ïa ki aiñ jong ka CAA 2019.
“Wat la ïa ka CAA, 2019 la pyllait ban pyntreikam ha ki jaka riewlum ka jylla, hynrei ha ka jingshisha ka Jylla Meghalaya baroh kawei kam hap hapoh ka Khyrnit Hynriew jong ka Riti Synshar ka ri India. Ki dang don ki jaka hapoh ka nongbah Shillong, ka nongbah jong ka jylla ha kaba ki kyndon aiñ jong ka Khyrnit Hynriew kim treikam satia bad kumjuh da ki hajar ngut ki poiwir kiba shong ba sah,” la ong u Bah Roy Kupar.
“Ha kum kine ki khep, lada ki briew kiba sah ha kine ki jaka ki shim kabu ïa ka jingbym treikam jong ka aiñ, ki lah ban rung sha kine ki jaka bad hadien kata kin sa aplai ban long nongshong shnong hapoh kane ka CAA, 2019, ha kata ka por kumno ka Sorkar Jylla kan khanglad ïa ki ban ïoh long ki nongshong shnong hapoh kane ka aiñ? Hato ki don ne em da kiwei pat ki lad ki lynti ban buddien ïa ka jingdon jong kine ki briew kiba sah mynta hapoh kine ki jaka khnang ba yn dup lah buh jingkheiñ na ka bynta ki jingdonkam hadien habud,” u la ong.
Une u nongïalam ka HYC u la ong, “Ngi sngewkhia bha wat la kiba bun ki jaka ha ka jylla la pyllait na ka jingshah kynthup ha ka CAA, 2019, ka Jylla kan shah ktah na ka jingwan tuid na kiwei ki jylla bad khamtam eh na ka jylla Assam. Ka jingbym don kano-kano ka aiñ kaba tehlakam ïa ka jingrung jong ki briew kiba nabar shapoh ka jylla, ngi sheptieng ba ka jingpyllait na ka aiñ kan pulom bad ngi lah ban mad ïa ki jingeh hadien habud na ka jingwanrung kyrthlep jong ki briew kiba nabar shapoh ka jylla.”
“Namarkata, ka lad jingïada kaba hakhmat eh ban tehlakam ïa kane ka dei tang ka jingpyntreikam noh mardor ïa ka ILP bad kumjuh ruh ban pyllait pura ïa ki kyndon jong ka Citizenship Amendment Act ha ka jylla,” u la ong.
