Shillong, Lber 18
U nongïalam ka National People’s Party (NPP) uba dei ruh u Symbud Myntri Rangbah u Bah Sniawbhalang Dhar u la ther ïa u MP ka Congress na Shillong, u Bah Vincent H Pala bad ïa ka Voice of People Party (VPP) halor ka jingkynnoh kum ka Sorkar ‘gunda’ bad jingkynnoh bamsap ha kaba u la kam ba ka Sorkar MDA ka dei kaba trei bad bun ki jingtei jingshna ki la urlong kynthup ruh ïa ki ar tylli ki ïingbasa kiba heh, ka Crowborough (Vivanta) bad Marriot.
Haba pynphai nia ïa ki jingkynnoh jong u Bah Pala uba la kynnoh ba ka dei ka Sorkar ‘gunda’ kaba bun tang ki jinglum pisa beaiñ ha surok, u Bah Sniawbhalang u la ong ba ym lah ban shu kynnoh namar lada lap ba don ki jingleh bym dei, dei ban ujor ejahar bad ki paidbah ruh ki lah ban ujor.
“Kum ka Sorkar kan leh eiei lada don ki jingujor ïa ki kam bym dei bad ym lah ban shu kynnoh ïa ka Sorkar kum ka Sorkar gunda,” u la ong.
Halor ka jingkynnoh bamsap ka VPP ïa ka Sorkar haba leit ai jingkren ha kylleng, une u nongïalam ka NPP u la ong ba bunsien kine ki kren kim ju pyrkhat bad dei namarkata ki ong ka dei ka ‘party kren ïew’.
U Bah Sniawbhalang u la ong ba u nongïalam ka VPP u kynnoh bamsap ïa ka Sorkar hynrei ma u hi u hikai bym dei ïa ki paidbah da kaba ong ïa ki ban bam pisa na shawei bad sa thep vote sha VPP bad kane ka dei ruh kaba hikai bamsap.
Haba kren shaphang ki kam kiba la trei da ka Sorkar MDA-I bad MDA-II, u Bah Sniawbhalang u la ong ba dei tang ka Sorkar MDA 1 bad II kaba shimkhia ïa ki kam pynroi kynthup ban pynïaid shakhmat ïa ka ‘administrative city’ ha New Shillong Township, ka jingshna ïa ki surok, ka jingpyntreikam ïa ka skhim JJM ka long kaba ïaid bha ha Jylla, ka jingkiew ka kam jngohkai bad jingtei jingshna ïa ki jaka sah ïa ki nongwan jngohkai, ka jingshna ïa ki ïing PMAY haduh 1.4 lak tylli, ka jingkham pynbha ïa ki jaka sumar bad shna pynbha ïa ki ïingskul kiba la shu ieh la bun snem bad ka jingpynbha ïa ki block office.
“Lada ym dei ka Sorkar MDA ki ïingbasa kum ka Crowborough (Vivanta) bad Marriot kim pat dep haduh mynta,” u la ong.
U la ong ba dang bun shuh ki hotel ban tei bad kane ka dei namar ka ka jingtuid ki nongjngohkai lyngba ka jingtreikam jong ka Sorkar MDA bad kum ka Jylla barit ngi dei kaba wan kham shakhmat.
U la ong ba ka Sorkar MDA ka trei beit ïa ki kam bad kiba kynthoh ki kynthoh khlem tip ïa ki kam kiba la leh da ka Sorkar.
U la ong ba ka Sorkar kan tei shuh sa 4500 tylli ki jaka sah (homestay) ban kyntiew ïa ka kam jngohkai bad dei kane ka Sorkar kaba kren shaphang ki samla bad ki lad ki lynti na ka bynta ki samla ha kaba la wanrah ïa ki lad seng kam bad pynshlur ïa ki jingsong kam kum ka CM ELEVATE bad kiwei kiwei ki lad seng kam.
“Ka Sorkar kam lah ban leh lut hynrei ngi trei shitom ban pyndep ïa ki kam kiba dei ban trei na ka bynta ka Jylla. Bunsien ki briew ki peit ïa ka bym lah ban leh bad kim peit ïa kiba ka Sorkar ka trei,” u la bynrap.
