Shillong, Lber 18
Uwei na ki samla pule ka Sankardev College Shillong uba dang pule ha ka 4th Semester ha ka tnat Political Science, u la kyrpad ba kino-kino ki kyrtong kiba ïoh ïa ka jingjop bad mihkhmat kum ki MP ïa ka jylla khamtam napoh ka Shillong Parliamentary Constituency ba kim dei ban leit hapoh ka ïingdorbar da kaba shu shong bad thiah lyngngai, hynrei ki dei ban leit ban kren bad rah ïa ki mat jong ka jylla khamtam ïa ki jingeh jong ki paid Khasi bad Jaiñtia.
Hapdeng ka kynta kylli jingkylli ha ka lympung ba la pynlong da ka Sankardev College ban ïa pyrkhat bad ïakren halor ka jingpynkhreh bad ka jingïakhun ïa ka ilekshon MP ka Lok Sabha shapoh ka ïingdorbar Parliament halor ka phang “Parliamentary Politics and Political Participation” ba la wan ban ïashim bynta da ki kyrtong bad ki nongmihkhmat na ki seng saiñ pyrthei bapher-bapher ki ban ïakhun ïa katei ka ilekshon napoh ka 1-Shillong Parliamentary Constituency kaba la pynlong hapoh ka Auditorium jong ka kolej ha Lah Sngi U Blei, utei u samla u la ong ba u MP u ban mihkhmat u dei ban rah bad ïakren halor ka mat Inner Line Permit (ILP), ka jingkynthup ïa ka ktien Khasi bad Garo hapoh ka khyrnit baphra jong ka riti synshar ka ri bad kumjuh ruh ban weng ïa ka jingïakajia khappud hapdeng ka jylla Assam bad Meghalaya kaba la neh da ki snem mynta.
“Lada uwei napdeng jong phi phin jop ïa kane ka ilekshon bad phin long kum u dkhot jong ka ïingdorbar, na ka liang jong nga, nga kyrpad ïa phi ba phin ym leit ha ïingdorbar tang da kaba phi shu shong lane thiah lyngngai hynrei sngewbha leit shathie ba phin hap ban kren ïa ki mat jong ka jylla khamtam lei-lei na ka bynta ki paid Khasi bad Jaiñtia”, la ong utei u samla.
U la ong ba kum u samla pule uba dang dei tang kum u khynnah hakhmat jong kitei ki kyrtong, hynrei u la kyrpad ïa kitei ki kyrtong ba ki dei ban ïaleh ban kiar na ka jingleh mynleh ne ka jingleh arsap ban buhrieh ïa ka jinglong bashisha jong ki. U la kyrpad ruh ba lada kitei ki kyrtong kin long kum ki MP kim dei satia ban bamsap.
“Nga kyrpad ïa phi ba phin ïaleh ban kiar na ka jingleh arsap ban buhrieh ïa ka ka jinglong bashisha bad kumjuh ruh ka jingbamsap, kumba phi kular ha ka por ïalap ilekshon ne ha ki mat treikam jong phi ha kaba phi ju ong ba phin leh lut nadong-shadong na ka bynta jong ngi, kumta phi dei ban leh shisha kumta bad ban pynurlong lut ïa ki jingkular baroh, wat shu kular ïa ki jingkular kiba phim lah ban leh hynrei kular ïa kiba phi lah ban leh”, la ong utei u samla.
Shuh shuh utei u samla u la ong ba u tip shai ba kitei ki kyrtong ki dei kiba la nang la stad bha bad kumta kam long kaba eh ïa ki ba kin kren ïa ki mat ki jura jong ka jaitbynriew hapoh ka ïingdorbar.
Utei u samla u la pynkut da kaba ong ba kumba teng-teng ki ju ong ba u khynnah u dei u kpa jong u rangbah, bad kumta u la kyrpad ïa kitei ki kyrtong ba kin leh ïa kaba dei na ka bynta ka bha ka miat jong ka jylla baroh kawei.
