Shillong, Lber 18
U Professor jong ka North Eastern Hill University (NEHU) bad uba long ruh u President ka NEHUTA u ban ïakhun ha ka ilekshon MP ka ban sa long ha ka 19 tarik Ïaïong kum u kyrtong shimet, u Professor Lakhon Kma haba ai jingkren ha ka rynsan ïatai kaba la pynlong da ka Sankardev College ha ka Lah Sngi U Blei, u la ong ba ka jingrai jong u ban ïakhun ha kane ka ilekshon MP ka dei ka rai kaba u la pyrkhat bha. Ka daw kaba la pynlong ïa u ban un ïeng ban ïakhun kum u kyrtong shimet ka dei ba um sngewïahap ne sngewmon ban pynïasoh ïalade bad kano-kano ka seng saiñ pyrthei.
U Bah Lakhon u la ong ruh ba ka kam jong u MP ka dei beit shabar jong ka jylla bad kam long kaba pher haduh katta-katta lada ym ïoh ban ïakynduh bad u ruh namar kumba la tip ba ha Meghalaya yn don tang 2 ngut ki MP kata uwei napoh ka Shillong Parliamentary Constituency u ban mihkhmat ïa ki 7 tylli ki distrik bad uwei napoh ka Tura Parliamentary Constituency.
Shuh shuh u Prof. Bah Lakhon u la ong ruh ba ki briew lada ki jied ïa u ba un long kum u nongmihkhmat sha ka ïingdorbar thawaiñ Lok Sabha un long marwei bad lada um long khlaiñ ban ïaid marwei un kyllon bad jynthut hangne-hangtai.
U la ong ruh ba u MP na Shillong Parliamentary Constituency un dei marwei hapoh ka ïingdorbar kam pher lada u don na kano-kano ka seng saiñ pyrthei ruh hynrei dei ban phah pat da u briew uba biang bad uba bit ban trei ïa ka kam.
U Prof. Lakhon u la pynkynmaw ruh ha ki snem ba la leit noh shadien, ka jylla Meghalaya ka la phah haduh 16 ngut ki MP bad napdeng kitei ki 16 ngut, 3 ngut na ki, ki dei ki kyrtong shimet da kaba pynliem ïa ki kyrtong jong ki seng saiñ pyrthei ba heh ha ka Ri. Ka daw kaba pynlong ïa u ban ïeng ïakhun ha kane ka ilekshon ka long ruh ba um don shuh ka jingshaniah ha ka rukom treikam bad ruh hadien ba u la ïohi ïa ka jingeh kaba ki khynnah samla ki ïakynduh halor ka kyrduh kam kyrduh jam.
