Mawkyrwat, Lber 19
Ka Regional Democratic Alliance (RDA) ha ka 19 tarik Lber ka la pynlong ïa ka jingïalang paidbah ha Ranikor, South West Khasi Hills District ban pan jingkyrshan na ki paidbah ka thaiñ ïa u kyrtong monlang ka RDA, u Bah Robertjune Kharjahrin u ban ïakhun ïa ka ilekshon MP na ka Shillong Parliamentary Constituency ka ban long ha ka 19 tarik Ïaïong.
Ha kane ka sngi la ïadonlang ki nongïalam ka RDA u Bah Metbah Lyngdoh, Bah KP Pangniang, Bah Lahkmen Rymbui, Bah Renikton Lyngdoh Tongkhar, Bah Olan Sing Suin, Bah Pius Marweiñ, Bah Titos Chyne bad kiwei kiwei ki ‘riew rangbah.
Haba kren ha ka jingïalang, u Bah Robertjune u la pynsngew ïa bun ki mat ki jura bad u la tyrwa ruh ba lada ki paidbah ki mon ban jied ïa u kum u nomgmihkhmat, u kular ban rah hapoh ka Dorbar Parliament ïa ki jingeh bad ki jingangnud ki paidbah, kiba kynthup ïa ka jingpyrshah CAA, ki aiñ Sorkar Pdeng kiba tehlakam ïa ka jingtih ïa ki marpoh khyndew, ki lad kamai lyngba ka khaïi-pateng bad ka Ri Bangladesh bad kiwei kiwei.
Ha kawei ka liang u Bah Robertjune Kharjahrin u la ther tyngeh ïa ki nongïalam ka VPP, u la ong ruh ba kam dei ka jingïakawang nia hynrei ka jingshisha ba napdeng ki seng ‘riewlum ha kane ka ilekshon MP, uwei u dei uba ai jait Kmie bad uwei u dei uba ai jait Kpa.
“Ym dei ba nga kynthoh hynrei ban ïada ïa ka Riti- Dustur ka dei ka mat ka jura jong ka RDA ba ngin kren mynta bad ïakren nangne shakhmat halor kane ka mat,” la ong u Bah Robertjune.
U la ong ruh ba kumno ban ïada ïa ka Riti-Dustur ha ka jingïohi jong u ka long ban pynkhlaiñ ïa ka Khyrnit Hynriew ym dei ban pynduh ne rat dyngkhong noh ïa ka. Ka jingpynkhlaiñ ïa ka Khyrnit Hynriew khamtam eh ban pynïoh ïa ka bor thaw aiñ kaba thikna da kaba pynïoh ïa kata ka mynsiem (spirit) jong ka Article 200 hapoh ka Khyrnit Hynriew ka dei ka jingraikut jong ka RDA khnang ba ki kam bei riti kum ka ai jait Kpa jong u Khasi kin nym ïohlad ha kane ka Ri.
Shuh shuh u la ong ruh ba ka dei ka jingshisha ba napdeng ki seng ‘riewlum, dei ka UDP bad ka HSPDP kiba la pyni ïa ka dur ka dar jong ka jinglong Rilum mynta la bun tylli ki snem. Ka UDP la 26 snem bad ka HSPDP la 50 tylli ki snem bad sa ka VPP ka dei ne kam dei ngin sa ïapeit ka long kumno.
Kumta ka jingïakhun ilekshon MP mynta hapdeng ki seng ‘riewlum kan long hapdeng uba ai jait Kmie pyrshah ïa uba ai jait Kpa, bad ki paidbah nongthep ‘vote’ kin hap ban jied MP halor kata ka nongrim.
