Nongpoh, Lber:
Ka shlem treikam jong ka Superintendent of Fisheries ka Ri Bhoi District, ka la pynlong da ka prokram ai jingpynshai halor ka mat kumno ban pynneh-pynsah ïa ki dohum-dohwah, dohkha-dohpnat kiba don shi lynter jong ka Wah Khri, kaba hap ha Ri-Bhoi District.
Kum ban shu pynkynmaw ha u u Jymmang 2023, ka la don ka jingshoh doh beaiñ ha Wah Khri ha kaba ki dohkha kiba heh bad rit ki la ïap bad per ha sla um jong katei ka wah bad la sakhi ïa kane lyngba ki rynsan lad pathai bapher bapher.
Ka Wah Khri ka dei ka wah kaba ïa phiah pud hapdeng ka Ri Bhoi District bad ka Eastern West Khasi Hills District, bad ym lah ban tip ba ka jingshoh doh ha shi lynter ka wah, lah ban dei na ki shnong kiba hap ha Ri Bhoi District ne Eastern West Khasi Hills District.
Halor kane ka jingjia, ka shlem treikam jong ka Superintendent of Fisheries Ri Bhoi, khlem da shong kli-kti, ka la leit ban pynlong ïa ka jingpynshai paidbah ha shong Mawdem ha ka 13 tarik u Lber 2024 ha kaba ki nongshong shnong kiba marjan ki la wan sakhi lang kynthup ïa ka shnong Belahari bad Rajakhumai. Kumjuh ha ka 14 tarik u Lber ki la pynlong ha shnong Warmawsaw bad ki shnong kiba wan don bynta lang ki long ka Umkynsier, Umtang, Umsohbar, Nongdom Mawpliang, bad Warmawsaw.
Ha kine ki jingpynshai paidbah, la ïashim bynta ban ïatai bad pynshai da ka Kong Meda Aihun Khongjliw, Superintendent of Fisheries ka Ri Bhoi, kaba la pynshai ïa ki shnong kumno bad sumar bad pynneh-pynsah ïa ki dohkha, bad ong ruh ba lada ka shnong ka ïatreilang ban peit pyrman bad pynjari ïa ki aiñ shnong kiba khlaiñ khlem pep kane ka wah kan wan biang ka jingroi jong ki ‘khasaw bad kiwei kiwei ki dohkha ba la jan duh jait, bad kumjuh ruh lada ki lah ban pynlong ïa ka kum ka ‘Fish Sanctuary’ ka shlem treikam ka kloi ban ïarap ïa ki skhim bapher bapher na ka jylla ne sorkar kmie bad ruh ban pynlong kum ki jaka jngohkai (Tourist Spot) ha kita ki sanctuary.
Ha kane kajuh ka prokram la ïashim bynta lang ruh da u Bah L Wahlang, Range Forest Officer ka Nongpoh Wild Life Range, ka Kong Joplin Lyngdoh Nonglait, Fishery Officer, Mairang, Bah P Suting, Fishery Officer ka Nongpoh, bad kumjuh ruh ki Sordar shnong jong kitei ki shnong kiba don marjan bad ka Wah Khri. Ha kane ka prokram la ïadon bynta lang ruh u Bah A Pator, President ka RBYF Western Zone, Bah R Pator President KSU Western Zone kiba la ai mynsiem ban ïatreilang bad ka ophis halor katei ka mat.
Hadien ba la dep pynlong ïa ka prokram pynshai paidbah ha ka 14 tarik u Lber 2024, na ka liang ka tnat kam dohkha bad ki nongkitkam shnong ki la ïoh ruh ban leit jurip ïa ka jinglong-jingman jong ka Wah Khri bad ki la lap ba kawei ka thwei kaba ki khot kum ka Thwei Sohjaren ka long kaba paka bad itynnad shisha ban pynlong kum ka ‘Fish Sanctuary’ ban pynneh-pynsah ïa ki dohum-dohpnat ba don ha kane ka wah. Kane ka jaka ka don hajan syndah shnong ka bym da jngai na ka surok rong bad ka lah ban khring ïa ki nongwan jngohkai na kylleng ki jaka lada ki bor shnong ki lah shisha ban pynneh-pynsah ïa ki dohum kumba long ha kiwei pat ki bynta jong ka jylla, bad kan long ka jingmyntoi ïa ki paidbah nongshong shnong ban ïoh kamai-kajih.
