Shillong, Lber 19
Ka Students’ Cell jong ka Lady Keane College ha ka Lah Sngi U Blei ka 18 tarik u Lber ka la pynlong ïa ka Youth Conference halor ka phang “Positive Youth Development”, kaba dei ka prokram kaba hap hapoh ka Chief Minister’s Youth Development Scheme 2022-23 ha ka College Seminar Hall.
Ka jingthmu jong kane ka jingïalang ka long ban ai jinghikai kaba pura halor baroh ki liang jong ka koit ka khiah.
Ka Dr Melodynia Marpna, Assistant Professor, Department of Nutrition and Dietetics, Martin Luther Christian University ka la kren halor ka phang “Nutrition for our youth”.
Katba ka Dr Sonali S Tesia, Consultant Psychiatrist, Mind and Wellness Clinic ka la ai jingmut halor ka phang “Mental health for young people”.
La pynkut ruh ïa ka jingïalang da ka jingpynkilan met hapoh ka jingïalam jong ka Kong Dapalei L Warjri, Zumba Instructor. Kiba poi sha kane ka jingïalang baroh ki don kumba 180 ngut ki khynnah jong ka kolej kiba la poi ban ïashim bynta.
