Shillong, Lber 19
Lai ngut ki kyrtong jong ka All India Trinamool Congress (TMC) na lai tylli ki konstitwensi kiba la ïakhun ïa ka ilekshon MLA 2023 ki la phah shithi sha u President ka All India Meghalaya Trinamool Congress ban iehnoh kam na kane ka seng namar ki daw shimet.
Kumta kine lai ngut ki la kyrpad ïa u President bad Secretary ka All India Trinamool Congress ba kin pdiang ïa kane ka shithi iehnoh kam.
Kine lai ngut ki long u Vincent T. Sangma u kyrtong na Mawsynram konstitwensi uba dei u nongaibuit jong ka Mawsynram Block, u Justine G Momin u kyrtong bad kum President ka Mawshynrut Block, West Khasi Hills District, u Sunmoon D Marak u kyrtong bad President ka Jirang Block kaba hap ha Ribhoi District.
Haba ïoh ban ïakren bad u Vincent T Sangma, u la ïathuh ba ka jingiehnoh kam ka dei beit na ka daw shimet jong kine lai ngut.
U la ïathuh haba kine lai ngut ki la iehnoh kam, ka mut ki nongbud jong ki baroh lai ngut na ki konstitwensi bapher bapher ki la mih lang na ka seng TMC.
Haba kylli sha kano ka seng kin leit pynïasoh, u la ïathuh ba kin sa rai ha kine ki sngi ban wan.
Ki khubor kiba la ïoh lum la ïathuh ba nalor kine lai ngut kin nang don ruh kiwei nongkitkam bad ki nongkyrshan ka TMC na kiwei ki konstitwensi kin sa mih noh namar kane ka seng kam shym la lah ban pynïeng kyrtong MP na Shillong konstitwensi.
