Shillong, Lber 19
Hadien na ka liang ki khynnah pule kiba ïakhun ïa ka matrik ne Secondary School Leaving Certificate (SSLC) 2024 hapoh ka jylla ha ka 15 tarik u Lber 2024, kaba dei artad ka sngi kut ban thoh eksamin ki la ud la nam ha kaba ïadei bad ka rukom buh ïa ki jingkylli da ka Meghalaya Board Of School Education (MBOSE) ki bym ïadei satia katkum na ka kot pule ba ki la pynkhreh bad trei shitom baroh shisnem.
Na ka liang kitei ki khynnah skul na ki skul bapher-bapher kiba wan thoh ïa katei ka eksamin ki la pynpaw ïa ki jingeh namar ka rukom buh ïa ki jingkylli da ka MBOSE ha ka sobjek Social Science mynta u snem ka khlem wan katkum na ka kot ba ki la pynkhreh shitom.
Halor kane ka bynta haba ïoh ban ïakren lyngba ka phone bad u Controller of Examination ka Meghalaya Board Of School Education (MBOSE) Tura, Bah T. R Laloo, u la ong ba na ka liang ka Board haba ka la wad jingtip bad kylli na ki nonghikai jong kitei ki skul kiba kitei ki khynnah ki la ud la nam, kitei ki nonghikai ki la ïathuh ba kane ka jingwan jong ki jingkylli ki bym dei katkum na ka kot pule ka dei namar ba ka skul ka khlem pynthymmai satia ïa ki kot pule kumba la leh lem da kiwei pat ki skul.
“Ngi la kylli na ki nonghikai hi namar ha kaba kut ki dei ki nonghikai kiba tip ïa kane ka daw ha kaba ki la ong ba ka daw kaba kongsan tam ka dei ba ki don ki skul ki khlem pynthymmai ïa ki kot pule jong ki, kata ka dei kawei na ki daw kaba lehse ka la pynlong ïa ki khynnah ba kin ym lah ïa ki jingkylli”, la ong u Bah Laloo.
Haba kylli ba kiba bun na ki khynnah skul kiba la ud la nam ïa kane ka jingïoh ïa ki jingkylli ki bym dei katkum na ka kot pule ki dei na ki skul kiba don ha nongbah Shillong, u Bah Laloo u la ong ba um lah ban ong thik kano ka skul kaba pyndonkam da ki kot barim ne ki kot bathymmai, hynrei katei ka jingud ki khynnah ka dei beit na ka daw ba kitei ki skul ba ki leit ki khlem pynthymmai satia ïa ki kot pule.
“Kata ka dei kawei na ki daw, ngam lah ban ong hynrei kata ka dei kumba la ong da ki nonghikai”, la bynrap u Bah Laloo.
