Shillong, Lber 19
U MLA ka VPP na North-Shillong konstitwensi, u Bah Adelbert Nongrum u la kyntu ïa ka tnad PHE bad Municipal ban shim ka jingkitkhlieh ha ka ban pyntikna ïa ka umbam-umdih kaba bha na bynta ka jingbit jingbiang jong ki paidbah nongshong shnong.
“Ka jingkylli kum u nongmihkhmat jong ki paidbah bad ngan ïai kyntu ïa kine ki tnad treikam ba kin sngewbha ban trei minot namar ka kamram ka long ba dei ban ai ka jingshakri kaba bha ïa ki paidbah khamtam ha kaba ïadei bad ka umbam-umdih namar ka um ka dei ka jingim bad ka jingïap jong ki paidbah. Khlem ka um, ngin ym lah ban im hynrei khlem ka bam, ngi tip ngi dang lah ban im katto-katne,” la ong u Bah Nongrum.
U MLA u la kyntu ruh ïa kine ki 2 tylli ki tnad treikam ba kim dei tang ban ai daw ba ka dei ka por tyrkhong hynrei ki don ka bynta kaba khraw bad ki hap ban shim ruh ka jingkitkhlieh khamtam ha sor Shillong ha kaba la bun tylli ki snem la mad ïa kane ka jingeh.
“Lano kum ki nongshong shnong ngin ïoh ïa ka hok, ki la dei ha ka jingshisha ban kham pyntikna ba ka um ka la dei ban kham bha, bad ki dei ban phah ïa kiba dei sha madan ban khmih ba ki don ki jaka ba ka um ka shlei bad pahuh hynrei ki don pat ki jaka ha kaba ki longïing ki hap ban thied ïa ka um,” la ong utei u nongmihkhmat.
Shuh shuh haba kdew ba ka tnad PHE ka dei ban pynbiang ka tyllong bad ka Municipal ka dei ban pynbiang ha ka liang ka jingsam, u MLA u la kyntu ba kine ki 2 tylli ki tnad ki dei ban trei hok bad ban ïatreilang na ka bynta ka bit ka biang jong ki paidbah ym ban ïa kynnoh iwei-ïa-iwei ne ban ïa thet-kti.
“Ki dei ban pyndep hok la ka kamram, ka deiti bad ka jingkitkhlieh,” u la ong.
