Nongpoh, Lber 19
Uwei u nongñiah trok u la mynsaw jur hadien ba ka trok kaba u ñiah ka la leit ban tynrah nadien jong kawei pat ka trok kaba la pynïeng ha ka surok bah National Highway 6 ha ka janmiet Lah Sngi U Blei ha Nongpoh kaba don marjan bad ka Ram Mandir.
Katkum ka jingtip ba la ïoh lum, katei ka jingtyngkhuh kali ka la jia ha ka por kumba 10 baje eiei katba katei ka trok kaba don ïa u nombor ML05-Z-9460 kaba dang kiew sha nongbah Shillong ka la leit ban tynrah beit-beit nadien jong kawei pat ka trok kaba don ïa u nombor NL01-G-6729 kaba la pynïeng ha shiliang jong ka surok na ka jingsniew jong ka shaka kat haduh ba u nongñiah jong katei ka trok kaba leit tynrah u la mynsaw jur.
Shuh shuh la ïoh jingtip ba utei u nongñiah jong ka trok ïa uba la tip kyrteng kum u Rajendra Das (28) na ka shnong 8 Mile Guwahati u la kum tynrah ïa katei ka trok kaba sangeh na ka daw jong ka jingshoh samthiah bad jingbym poi pyrkhat tad haduh ba ki bynta ba shakhmat jong ka trok kaba u ñiah ka la jan dam syndah bad sahkut ïalade hapoh ka trok.
Ïa utei u nongñiah uba la mynsaw jur bad kdiah ruh ha bynta jong ka kjat la lah ban sei noh na katei ka trok lyngba ka jingïarap jong ki paidbah bad ki pulit na thanat Nongpoh. Hadien kata la pynkit noh mar-mar sha Civil Hospital Nongpoh ban pynïoh ïa ka jingsumar kaba kyrkieh.
