Shillong, Lber 19
Ka jingthep kyrteng ki kyrtong ki ban ïakhun ïa ka ilekshon sha ka Ïingdorbar Lok Sabha na Shillong bad Tura Parliamentary konstitwensi kan sdang ha ka Sngi Balang kaba dei ruh ka sngi ba pynmih ïa ka jingpynbna ban thep kyrteng.
Kumta ka jingthep kyrteng kan sdang naduh ka 20 tarik bad kan kut ha ka 27 tarik u Lber bad ka jingpeit bniah ïa ki kot ki sla thep kyrteng jong ki kyrtong kan long ha ka 28 tarik u Lber.
Ka tarik bakhatduh ïa kito kiba la dep thep kyrteng ban weng na ka thup jong ki kyrtong ka dei ha ka 30 tarik u Lber.
Ki ar tylli ki konstitwensi na Meghalaya, kita, ka Shillong bad Tura Lok Sabha konstitwensi ki hap ha ka wat banyngkong jong ka jingthep ‘vote’ ka ban long ha ka 19 tarik Ïaïong.
Ka Shillong Lok Sabha konstitwensi kaba kynthup ïa ki 36 tylli ki konstiwensi MLA, ki don 13,96,054 ngut ki nongthep ‘vote’, katba ki nongthep ‘vote’ ha Tura Lok Sabha konstitwensi kaba kynthup ïa ki 24 tylli ki konstitwensi MLA, ki don 8,21,046 ngut.
Kane ka long katkum ka thup kyrteng jong ki nongthep ‘vote’ kaba la pynmih ha ka 5 tarik Kyllalyngkot 2024. Ha Shillong, ki shynrang ki don 6,81,769 ngut bad ki kynthei ki don 7,14,283 ngut.
Ha Tura pat, ki shynrang ki don 4,13,178 ngut katba ki kynthei ki kham duna ban ïa ki shynrang bad ki don 4,07,867. Baroh ki nongthep ‘vote’ ha kine ki ar tylli ki konstitwensi ki don 22,17,100 ngut.
