Shillong, Lber 19
Ki pulit ha ka Lah Sngi U Blei ka 18 tarik ki la ïoh ban kem sa uwei suba donkti ha ka jingpynbthei bom IED ha Them Ïew Mawlong kaba la jia ha ka miet jong ka 9 tarik mynta u bnai.
Une u briew uba la shah kem noh ha ki pulit u dei ba la tip kyrteng kum u Namphyrnai Lyngdoh Peinlang, 21 snem ka rta, na ka shnong Peinlang.
Ka jingïoh kem ïa une u briew ka la long lyngba ka jingïatreilang hapdeng ki pulit ka East Khasi Hills, Ri-Bhoi bad ka Mairang, Eastern West Khasi Hills. La ïoh kem ïa u na Mairang bad hadien kata la wan pynkit noh sha Shillong.
Ha ka kyrwoh khubor na u Superintendent of Police ka East Khasi Hills u Rituraj Ravi, la ong ba une u briew u dei uba don ka jingïadei bad uba ïajan bha bad ki dkhot ka seng Hynñiewtrep National Liberation Council (HNLC).
Na ka jingïoh kem sa ïa une uwei, ka jingshah kem ki briew ba suba donkti ha kane ka kam, ka la kiew sha ka 7 ngut, kata ar ngut kiba la shah kem ha kaba sdang, saw ngut na Ri-Bhoi bad une uwei na Mairang.
U SP u la pyntip ba ka jingtohkit halor kane ka kam ka la ïaid shakhmat bad na ka liang ki pulit ka East Khasi Hills ki dang ïaleh bad trei shitom ban kem ïa baroh kito kiba don bynta ha kane ka kam ban wanrah ki kam pyntriem.
