Shillong, Lber 19
Ki pulit ki la ïoh ban kem noh ïa 3 ngut ki briew haba ïadei bad ka jingjia shah bom shnong ha u paidbhur ha ka shnong Lawmei, East Khasi Hills ha ka Sngi Saitjaiñ.
Kitei 3 ngut ki la shah kem noh ha ka step Sngi Ba-ar na ka shnong Mawthlong ha ka por kumba 12:30 hynrei la pyllait noh ïa ki hynne mynsngi ha ka por 12 baje hadien ba la ïoh jamin bad hadien ba la pyndep ïa ka jingtohkit kaba bniah.
Kitei 3 ngut ki kynthup ïa u Skerling Pyrtuh (39 snem ka rta) na ka shnong Mawthlong, Traibor Lyngdoh (30 snem ka rta) na ka shnong Nongbsap bad Kyntiewnam Pyrtuh (28 snem ka rta) na ka shnong Mawthlong.
Ka jingtohkit halor katei ka jingjia dang ïaid.
Kum ban shu kdew hangne, 2 ngut ki briew ki la shah tied shah bom shnong ha ki paidbhur halor ka jingsuba bad kynnoh ba ki dei ki menshohnoh, kaba la jia ha ka shnong Lawmei ha East Khasi Hills ha ka step Sngi Saitjaiñ.
Ka jingpoi noh jong ki pulit ha ka por kaba biang hadien ba ki la ïoh jingtip, la lah ban pyllait im noh ïa kitei 2 ngut ki briew na ka kti jong ki paidbhur.
