Shillong, Lber 19
Bun na ki kmie ki kpa jong ki khynnah skul ki la mad jingeh namar ki hap thied kot arsien namarba ki don ki dukan die kot ki bym treh shuh ban bujli da kawei pat ka kot haba lap ba don jingbakla ha ki lynnong.
La ong ba ki don ki kot pule jong ki khynnah skul kiba ïahap ka kyrteng jong ka kot bad ka kyrteng u nongthoh kot. Hynrei ynda la plied shapoh, ki lynnong kiba don hapoh jong ka kot kim ïahap.
Kumba ka ju long, ki kmie ki kpa haba ki thied kot pule ïa ki khun, ki ju leit kylliang noh lada kata ka kot kam ïahap bad ki shim bujli noh da kawei pat.
Hynrei katkum ka jingïathuh jong katto-katne ngut ki kmie ki kpa, ki la ong ba ki la mad jingeh namarba ki dukan die kot ruh kim treh ban pdiang ïa kita ki kot pule ki bym ïahap.
“Ka long kaba eh ïa ngi ki kmie ki kpa ban thied biang ar sien ne lai sien ïa kajuh ka kot pule jong ki khun tang namarba don ka jingbakla ha ki lynnong,” la pynpaw iwei na ki kmie ki kpa ba la ïakynduh jingeh.
Ki la ong ban pyndonkam ïa kata kawei ka kot kaba la dep thied ruh ym lah, ban thied biang da kawei pat ka kot pule ruh ka dei ka jingeh. “Lada ki dukan die kot ki pdiang ban shim noh ïa kita ki kot ki bym ïahap, bad ai bujli da kawei pat ka kot kaba ïahap, kan long ka jingïarap shibun,” la pynpaw ki kmie ki kpa jong ki khynnah skul.
Uwei na ki kpa jong ki khynnah skul u la ai nuksa ba ma u ruh ha ka por ba leit thied ïa ka kot Computer Science na dukan die kot, ka kyrteng u nongthoh kam don jingbakla, hynrei ki lynnong kim ïahap. U la ong ba ynda la leit rah ïa kot sha dukan die kot ban pynphai, kim treh shuh ban shim.
Kumta ki la kyntu ïa ki bor ba dei khmih ban peit ïa kane ka jingeh namar ki kot kiba pynmih kim dei ban bakla ki lynnong khamtam haba khlem bakla ïa ka kyrteng jong ki nongthoh kot.
