Shillong, Lber, 20
Kum shibynta ban pynsah jingkynmaw ïa ka jingïaid lynti kaba 46 snem jong ka seng, ka Khasi Students’ Union (KSU) Mawlai Circle ha ka Sngi Balang ka la aiti ïa ka ïing ba ka seng ka la pynshna mon sngewbha sha ka Kong Regina Jyrwa; ka longkmie kaba don 10 ngut khun bad kaba im kamai jakpoh da kaba shu bylla sngi ban pyndap pynbiang ïa ka ïing ka sem bad ïa ki khun ki kti.
Kaei kaba kham sngewtynnad shuh shuh ka long ba ïa ka jaka ba la shna ïa ka ïing kaba saw kamra la ai sngewbha da ka Kong Streamlet Kharbhih.
La plie paidbah ïa katei ka ïing da u General Secretary ka KSU, Central Executive Council u samla Donald Thabah ha ryngkat ka jingsakhi lang jong ki nongïalam ka seng, ki nongïalam jong ka Federation of Khasi Jaiñtia and Garo Peoples (FKJGP), ki longkpa bad ki longkmie jong ka Block-X ka Mawlai Nongkwar, Shillong, u Rangbah Shnong ka Mawlai Nongkwar Bah M. Rumnong, Secretary Shnong Bah Ezekiel, Vice President ka KSU CEC Biangbor Paliar uba dei ruh u President ka KSU Mawlai Circle bad kiwei-kiwei.
Na ka liang ka Kong Regina ka la pynpaw ïa ka jingsngewnguh ïa ki jingleh bha jong ka KSU ha ryngkat ka jingjaw ummat kmen bad ha kajuh ka por ka la ai khublei kyrpang eh ïa ka Kong Streamlet Kharbhih kaba la ai sngewbha ïa ka jaka ban shna ïa ka nongrim ïing.
Na ka liang ka KSU Shillong Mihngi Circle ha katei ka sngi ka la noh synñiang ruh da ki Laptop bad komputar sha ka skul jong ka Dorbar Shnong Nongmensong hapoh ka jingïalam jong u Finance Secretary, samla Khrawbor Kharkongor bad u Education Secretary, samla Jeremaiah Pohthmi bad kane ka jingnoh synñiang jong ka seng ka long ban ïarap ïa ki khynnah kiba pule ha kane ka skul.
Nangta la pdiang ïa kine ki jingai sngewbha na ka KSU da ka Principal jong ka skul ryngkat ka jingsakhi lang jong ki nonghikai.
