Khliehriat, Lber 20
Bun bah ki kam hapoh ka Shillong Parliamentary Constituency, hynrei ym don ba pynsngew hapoh Parliament kumta jied ïa ka kyrtong jong ka NPP kan ïasaid bad wanrah ki jingdonkam jong ka jylla sha ka Sorkar Pdeng la ka dei ki skhim bad kiwei kiwei.
Ïa kane la kyrpad da ka Dr. Ampareen Lyngdoh ha ka jingïalang ïalap ilekshon ha Jalaphet ha ka Sngi Balang ha ka jingdonlang u Symbud Myntri Rangbah ka jylla, u Bah Sniawbhalang Dhar, ka MLA ka thaiñ, Kong Santa Mary Shylla, u MLA ka Jowai, u Bah Wailadmiki Shylla nalor ki MDC ka NPP bad ki paidbah.
“Lada nga jop ïa ka MP ngan buddien ïa ki skhim ka Sorkar Jylla ba ka khmih na ka Sorkar Pdeng,” la ong ka Kong Ampareen bad bynrap ba jingeh kumba long mynta ym don uba bteng ïa ki kam ka Sorkar Jylla bad ka Sorkar Pdeng namar uta uba la shah jied baroh shi katta u don ha ka liang pyrshah bad ban khana bad ka Sorkar India ka don ka jingeh shibun.
Dei namar kata ka daw ka long kaba donkam ban jied MP da kiba don lypa ha ka sorkar ban ïohi shisha ka jinglah ki MP ban treikam, la ong ka Kong Ampareen.
Ka la kyrpad ïa ki nongshong shnong ka Sutnga-Saipung ba kumba ki la pynjop ïa ka Kong Santa Mary Shylla na kane ka konstitwensi kum ka MLA, kin pynjop ruh ïa ka kyrtong MP na ka seng NPP khnang ban ïatreilang bad ka MLA bad baroh lang ki nongïalam shnong ha kawei ka lynti kaba ryntih.
Ka Kong Santa Mary ha ka jingkren ka la pynsngew ïa ki jingeh jong kane ka konstitwensi ha ka liang ki lynti syngkien bad ki surok. Ka la kyntu ruh ïa ki nongshong shnong ka Sutnga-Saipung kumba ki la pynjop ïa ka ha ka ilekshon, ba kin pynjop ruh ïa ka Kong Ampareen khnang ba kan ïasaid na ka bynta ki jingeh jong ka jylla bad ka jaitbynriew.
Na ka liang u Bah Sniawbhalang u la kyrpad ïa ki paidbah ban jied ïa ka kyrtong ka NPP ha kane ka ilekshon namar ka dei ka longkmie kaba la ih bha bad kaba trei shitom na ka bynta ka bha ka miat ki paidbah bad ka roi ka par jong ka jylla.
