Nongstoiñ, Lber 20
Ka Hynñiewtrep Youths’ Council (HYC) Mawshynrut Circle, ka la leit ban ujor sha u District Labour Officer (DLO) West Khasi Hills District halor ka jingbym wan trei tista jong u Inspector ka tnat Labour hapoh Mawshynrut Block.
Ka seng hapoh ka jingïalam u samla Losbingnel Lyngkhoi kum President bad samla Banteilang Hoojon kum General Secretary, ha ka Sngi Balang ki la leit ban ïakynduh ïa u DLO ka West Khasi Hill District ban pynsngew halor kane, bad ban dawa ruh ba dei ban wanrah bujli noh da uwei ha kane ka tnat.
Nalor nangta, ki nongïalam ka HYC Mawshynrut Circle ki la pyntip ba ha ka 8 tarik mynta u bnai, ki la dep ban leit jurip ïa ka shlem treikam jong u Inspector of Labour Block ka Mawshynrut bad la lap ba don tang ki nongtrei kiba trei ha kane ka shlem treikam khlem ka jingthoh (signboard) habar jong kane ka shlem treikam.
“Ka seng ka dap da ka jingsngewkhia halor kane namar ka jingbym wan trei tista jong u Inspector, ka la wanrah jingeh ïa ki paidbah nongshong shnong khamtam haba ki donkam ha kane ka shlem treikam,” la ong kitei ki nongïalam. Shuh shuh ki la ong ruh kaba pynlyngngoh ïa ka seng ka long ba ïa ki kot ki sla ruh la hap shu rah sha Nongstoiñ na ka bynta ban pyndep ïa ki jingdonkam ha ka ban register ïa ki kyrteng bad kiwei kiwei ki jingdonkam hapoh kane shlem treikam.
“Kane ka jingbym wan trei thikna u Inspector ka la pynlong ïa ki nongtrei, ba ki hap ban trei noh tang shisien shitaïew (Sngi Thohdieng) ha kane ka shlem treikam namar ka jingbym don u Inspector kane ka tnat,” ki la ong.
Namar kata, ka HYC ka dawa ïa u khlieh duh jong kane ka tnat treikam hapoh ka Mawshynrut Civil Sub-division ban tuklar lem ïa kane ka kam khnang ba ki paidbah ka dong ka thaiñ kin kham suk bad ruh ban lah ban ai ka jingshakri ba bha bad kaba janai.
Ki la ong ruh ba ha katei ka sngi, ba wat la ha katei ka sngi kim shym la ïoh ban ïakynduh ïa u DLO ba um don hynrei ki la ïoh ban aiti da ka jingthoh, bad ban dawa ïa ka shlem treikam ban phah bujli noh namar la da ki snem um ju wan trei thikna khnang ba kan long ka jingbit jingbiang ïa ka dong ka thaiñ.
